蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年10月09日

【環球倒戈撐ViuTV】譚校長出山做主持 劉華學友做嘉賓聯手打無綫

26,107
校長將會為ViuTV主持節目。
建立時間 (HKT): 1009 23:36

ViuTV開台半年,雖然首季蝕咗6800萬,亦暫時未見佢哋能夠對無綫收視造成衝擊,但係佢哋未因為蝕錢而閂水喉,繼續試新嘢。

相關新聞:【又嚟撐ViuTV?】被睇中邀拍劇 蔡卓妍:歡迎所有嘅合作機會

ViuTV開台至今主打實況娛樂同真人騷嘅,聽聞出年會改變方針,會繼續做新一輯《跟住矛盾去旅行》同《G-1格鬥會》等節目之外,會開始主力做音樂節目,搵咗唔少猛人助陣!《蘋果》收到可靠消息,譚詠麟(阿倫)嚟緊會主持《譚校長談欣賞》,呢個節目暫定有10集,每集阿倫都會邀請有份量嘅歌手擔任嘉賓,據知已經落實包括張學友、劉德華、五月天同孫楠等等。阿倫一向風趣搞鬼,佢主持節目應該會有一定吸引力,但就未知到時佢哋除咗傾偈之外,會唔會一齊jam吓歌。

除咗阿倫主持新節目之外,ViuTV會開拍一個落區唱歌嘅音樂節目,由Dear Jane、RubberBand、Robynn & Kendy同C AllStar呢四隊樂隊組合,每次會聯同許志安以及唔同歌手落區開騷。

ViuTV星期二會喺灣仔演藝學院舉行「2017年節目發佈會」,到時阿倫、許志安、劉美君、Dear Jane、C AllStar、RubberBand、衛蘭、Gin Lee(李幸倪)等出席。睇番今次有好多環球歌手力撐ViuTV,無非因為早幾個月前,無綫因為要環球唱片公司簽一世任用網上播放權,亦即係要環球旗下嘅歌曲,永久俾無綫喺網絡平台使用,環球覺得好唔公平,於是再同無綫反面,亦因為呢個原因,加強咗環球同ViuTV合作。

對於搵阿倫主持節目同加強音樂節目製作,ViuTV公關部王小姐噚日回應話:「有關未來新節目內容會喺星期二嘅發佈會先公佈。」RubberBand成員泥鯭就話暫時未收到消息,佢話:「冇落實拍嘢住……落區玩音樂梗喺有興趣啦,係就快啲啊……但係12月前RubberBand都會比較忙,因為要籌備音樂會,就到時間係可以嘅。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載