蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年11月04日

陳寶儀親證前《都市閒情》主持 盧念國昨凌晨病逝

319,722
建立時間 (HKT): 1104 14:55

鄺佐輝去年12月因癌症逝世,想不到未足一年,另一位前《都市閒情》主持盧念國亦離逝。人稱「盧盧」的盧念國,於昨日凌晨病逝,終年57歲。

相關新聞:【盧念國病逝 】前《都市閒情》主持楊瑞麟:生命很脆弱

今日《蘋果》致電盧盧昔日的好拍檔兼好友、前《都市閒情》主持陳寶儀,寶儀親口確認盧念國的死訊。她說:「佢中風第二日成班舊同事收到WhatsApp,佢星期一(上月31日)夜晚同朋友食完飯之後就出事,星期二我收到楊瑞麟通知,跟住收到表姊(余文詩)wechat,即刻仆出去啦,已經話佢情況唔係咁樂觀,佢喺廣華醫院,去到有一班舊同事同朋友,嗰陣時佢已經昏迷冇反應,大家都喺佢耳邊傾偈,安慰佢,希望佢加油。大家知情況唔係太好,但唔知有乜可以做,當然有為佢祈禱,到星期三,我再收到表姊wechat,話好似唔係好好,佢啲屋企人喺度,我話:『死啦,真係咁嚴重撐唔住?』到第日一起身就收到佢星期四凌晨6點幾走咗。」

對於昔日舊拍檔離逝,寶儀坦言,星期二那天,自己也病到七彩,但都趕去醫院探望盧盧,想不到到昨日凌晨他就走了。她說:「好唔開心,因為佢係我個女嘅補習老師,當年我做《都市閒情》嗰陣,我個女讀小學,請補習先生,但冇一個敢教佢,就算教兩個禮拜都會走,因為女拔萃啲嘢實在handle唔到,唔敢教,嗰時我好頭痕,周圍拜託啲人,唔係我個女曳,而係功課太深,跟住盧盧問我個女讀幾年班,我唔知話2年班定3年班,跟住佢話我教佢啦,你放唔放心,我問佢教邊科,佢話邊科都得。佢好嚴好惡,但教到我個女非常之好,一教就教到小學畢業,嗰個期間我都有介紹唔知蘇杏璇定朱咪咪個小朋友去補習,佢中英數都好。佢唱歌亦好聽到不得了,喺香港我搵唔到邊個歌星拍得住佢把聲,靚到呢....同埋佢記性好到唔可以相信,佢一目十行,跟住唔需要再睇稿,仲一字不漏噏晒出嚟,我哋嗰時重講笑話第日百年歸老之後要解剖你個腦,點解咁勁呢!」

相關新聞:【盧念國病逝】對舊拍擋病逝感愕然 鍾淑慧:佢係一個正氣嘅人

寶儀坦言:「好唔捨得,唔係淨係一個舊同事,而係我同佢真係好close,我真係將個女交俾佢,佢教得非常之好。」寶儀表示,盧盧並未結婚,年齡不太清楚,應該約50多歲,由於盧盧是一名天主教徒,相信喪禮將採用天主教儀式,後事將由他的胞弟和好朋友安排。

她續稱,年幾前曾相約盧盧食飯見面,當時他的身體已經唔多好:「佢個腎有事,佢一路身體唔好,瘦咗好多,但同佢出嚟食飯佢都好乖戒口,但一樣談笑風生,反應好快。」問到盧盧離開無綫後從事甚麼工作?她說:「聽講有幫小朋友補習,之後做啲乜我真係唔知。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載