蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月03日

【獨家】港姐冠軍 風頭躉馮盈盈大學畢業企中間

121,364
建立時間 (HKT): 1203 19:30

現年22歲應屆港姐冠軍馮盈盈,當選後第二日瞬間被踢爆大學時期,經常喺fb連環爆粗鬧建制派同特首梁振英;但之後馮盈盈好快拆彈,接受訪問時話只能怪自己當時年紀小,受到大學熾熱氣氛影響,先會有呢啲咁激嘅言論,仲話自己平時好少講粗口,點知話口未,馮盈盈又俾眼明手快網民摷番之前佢同司徒夾帶玩滑翔傘嘅短片,當中聽到佢好響亮咁講「呆X咗!」,「粗口港姐」之名都好難撇甩。

大學生涯確實令馮盈盈經一事長一智,但噚日佢終於都畢業喇!

馮盈盈喺香港大學讀食物及營養學系,噚日該學院舉行畢業禮。讀者林先生透過《蘋果》嘅「爆相爆片」報料,可能係港姐冠軍關係,故馮盈盈獲安排企正中間影大合照相。

馮盈盈考獲二級下等榮譽(2nd lower honour),林先生話﹕「佢着咗高踭鞋,都幾eye catching(引人注目),見佢影團體相時企喺校長後面,即係正中間位,全班都有三、四十人。」

林先生話馮盈盈都算係風頭躉,唔少同學都有同佢影相,林先生話﹕「佢都幾nice周圍同人影相,男女都有,估計係佢父母都有嚟到,但就好似唔見佢男朋友。」

而馮盈盈亦有喺ig貼上畢業相,仲拍咗一條片,示範點樣着畢業袍最有型,佢hashtag#如何著畢業袍而不失霸氣#老馮畢業喇,十分搞鬼!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載