蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月17日
馬上成為壹會員

【獨家】麥包正式離開無綫 結束29年賓主關係

建立時間 (HKT): 1217 00:12

做過兒童節目主持,近年主力拍劇嘅(麥包)麥長青,喺無綫無間斷咁服務咗29年,本來一直相安無事,點知喺上個月突然傳出話麥包同無綫喺合約達唔成共識,隨時離巢結束29年賓主關係,近日佢已經正式離巢。

相關新聞:【轉合作方式】離巢後轉做導演監製 麥包出年仲可以拍《街市遊樂團》

今日《蘋果》向麥包求證,佢承認同無綫轉咗另外一個形式合作,並唔係傳聞中嘅唔開心,麥包話:「我好開心喎,呢個係我自己嘅要求,原本係想離開出去發展,我想有自由度做自己嘢,樂小姐(樂易玲)一直都有搵我傾,不過只係大家都誤解晒所有嘢,結果我哋認真溝通過之後,公司好體諒同支持,今次真係好開心。」

話晒離開一間工作咗29年嘅公司出去發展,點都有啲掙扎,但係麥包話:「冇,今次冇呢樣嘢,可能因為今年啲氣氛令到自己有少少唔舒服,可能係一個變化緊嘅時代,自己未必適應到呢個變化,以前我從來都冇呢個危機感,一直都覺得係天生天養,只要你肯做,又唔係做唔到嘢,一定會有人俾嘢你做,但係今年好似係等人俾嘢你做,我要搵食,始終我有頭家要養,呢樣真係覺得好危險,搞到我有一刻懷疑係咪自己做唔到嘢?我真係唔知。」

相關新聞:【唔只識演戲】商場醫生專幫「死城」 麥包出手市值翻倍

咁啱喺年初有傳因為高層角力,搞到麥包成為犧牲品,擔正做男主角夢碎,(新聞連結: http://bit.ly/2gRrYPD ),唔知呢件事對佢有冇影響?佢好坦白話:「我諗有少少,但係呢個唔關人哋事,係我自己嘅問題,因為之後都冇嘢做,我自己懷疑係咪自己唔得,我唔係好鍾意去乞求、等人施捨,或者要人哋可憐俾啲工作,可能我細個經歷寄人籬下,所以由細到大都好唔鍾意呢個感覺,唔想屋企人同自己再有呢啲經歷,我一直同自己講,要靠雙手去努力做嘢,令屋企人同自己有番個尊嚴,唔需要人施捨,亦唔想睇人面色做人,所以今年我好唔舒服同唔開心。」

直到之後拍《街市遊樂團》,令到佢解開呢個困擾,麥包話:「余詠珊有同我講過,佢話同我合作之後,佢覺得我係可以做自己嘢,之前有傳佢唔鍾意我,但係佢又搵我做嘢,於是我直接問佢,我係咪得罪咗佢?點知佢話冇,仲話如果你得罪我會話俾你聽,但係你從來都冇。」佢仲話:「以前我唔敢問,我唔識任何一個高層,我只係識做事,但係唔識做人,我諗其實要同啲高層、行政人員多啲溝通,少啲誤會,今次中間係有好多誤會、一啲自我審查、一啲無中生有嘅事,反而今次大家傾落係好爽,原來有溝通,成件事係好舒服。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載