蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月20日

【唔再係「豬肉獎」】新城頒獎禮減剩55個獎項 Eason祖兒繼續缺席

17,928
建立時間 (HKT): 1220 22:15

新城勁爆樂壇頒獎禮將於後晚假會展舉行,過往年年頒逾百獎項,去年甚至頒160個「豬肉獎」,隨住前高層朱明銳被退休,由佢揸弗嘅勁爆頒獎禮亦改頭換面,據知,今年獎項將大刪減至僅得55個,仲向唱片公司講明,頒獎禮一定喺晚上11點前完成,唔會好似往年咁頒到死唔斷氣,凌晨零時都未頒完。

可惜,由於近年樂壇沉寂,頒獎禮唔再係年度盛事,雖然勁爆獎項少咗,但並冇因為咁令唱片公司覺得物以罕為貴!據知,天王天后級嘅歌手通通缺席,包括陳奕迅(Eason)、容祖兒、大肚謝安琪,連「新城家嫂」G.E.M.都以工作在身,唔喺香港為由缺席,星光認真暗淡!上年以放假為由已經唔玩嘅陳奕迅(Eason ),今年繼續缺席各大頒獎禮,不過以Eason嘅地位,就算唔到都會照有獎,據知佢會憑《四季》獲金曲獎。其所屬環球唱片表示:「Eason唔去頒獎禮,但Gin Lee同AGA會出席勁爆,以平常心面對獎項。」

至於前年新城同英皇鬧不和,祖兒缺席勁爆頒獎禮,被新城前高層朱明銳豎中指捽鼻暗寸,雖然之後雙方化干戈為玉帛,但今年祖兒繼續唔玩勁爆,本報向英皇求證獲回覆:「去唔到,因為祖兒唔喺香港。」而往年被新城厚待嘅宇宙巨G.E.M.,其經理人公司同樣表示:「有工作在身,唔喺香港出席唔到。」似乎唔係咁畀面喎,不過據聞祖兒缺席照有獎。

新城節目執行總監(綜藝)劉婉芬接受《蘋果》電話訪問表示:「16號截止投票,收到接近一萬人投票,o依家仲點緊數。」問到祖兒係咪唔出席?佢支吾以對話:「仍然同英皇傾緊,希望祖兒嚟,未到最後一刻都會盡最後努力。」

劉婉芬話如果歌手真係有事嚟唔到,新城都會照頒獎,仲透露今年新增現場投票嘅「最撐男/女歌手/組合」同「最撐歌曲」獎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載