蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月23日

【獨家】32E鄧洢玲開按摩店派福利 落埋場揼骨做埋推拿

17,903
最後更新: 1223 00:01 / 建立時間 (HKT): 1223 00:00

想當年o靚模出身32E嘅鄧洢玲(阿旦),青春無敵時,佢唔介意拋胸倒瀉奶出寫真誘宅男,近年佢喺ViuTV做主持,仲多咗樣技能:口才。藝人唔同年齡做唔同崗位,阿旦喺娛圈打滾咁多年,點會唔明白「花無百日紅」呢個道理,所以近年佢開始為自己打算,近日仲同一名閨密喺銅鑼灣開按摩店Blossom-The Secret Garden,兩女生合股近百萬博一鋪。

相關新聞:【以前係o靚模】按摩店預計1年回本 阿旦唔敢試性感水手裝

身為老闆娘嘅阿旦主力做生招牌,面積約1,500呎嘅按摩店,放咗僅8張按摩椅,仲有兩間獨立房,布置簡約,予人寬敞舒適感覺,阿旦話客人到場會先招呼浸腳,紓緩一下先進行全身按摩或者按腳,服務絕對周到。訪問當日,阿旦仲半祼瞓身示範推油,任按摩技師為佢服務,阿旦爽到唔肯叫停。

問到阿旦點解要揀開上樓按摩店,佢話:「我好真實,我人生得兩個願望,我鍾意打牌同揼骨,但o依家開雀館會攞唔到牌,所以我唯有開骨場,但我呢個『秘密花園』係正骨場。」阿旦呢幾年拍嘢儲咗私己錢,佢話:「我拎晒筆積蓄出嚟㗎喇,但呢嚿錢又唔夠我上車買樓,我係連嫁妝都拎晒出嚟,嫁唔出㗎喇。既然買唔到樓,我就諗不如開間按摩店,畀大家唞下氣,畢竟香港人面對太大壓力。」

阿旦間按摩店有別傳統嘅店舖,入到去係開揚光猛,一啲都唔幽暗,阿旦話:「我哋特別揀白色為主,雖然好易污糟,但我有信心保持乾淨,我哋係英式裝修風格,帶啲公主風。以往揼骨地方好黑暗,黑麻麻,我覺得一開燈會好污糟,但我好有信心我呢度係舒適,遲啲仲會搞租場畀人開P。」

首次創業嘅阿旦邊做邊學,佢話稍後仲會趁空閒去學埋推拿:「將來生意好,唔夠師傅,我會親自落場,但我只接女賓,男賓就冇呢啲福利,唔可以畀人誤會。」阿旦認為做生意,一定要親力親為,力不到不為財,佢話周末周日同公眾假期,仲會向客人派福利,佢話:「我哋會有靚湯同糖水供應,大家上嚟仲可以試下我啲手勢,希望畀客人有養生感覺。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載