蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月23日

《SE7EN》主持挑戰100公里山路賽 2日2夜冇瞓過

7,167
(攝影:沈健程)(蘋果日報)
建立時間 (HKT): 1223 18:05

ViuTV節目《SE7EN》主持陳子豐、駱振偉、陳俞希、黃奕晨(Dixon)、楊偲泳(Renci)、岑樂怡(阿妹)將拍攝第二輯,再度挑戰唔同任務,而上輯因懷孕未能加入嘅余曉彤(Hidy)亦歸隊,眾人再度合作,甚有默契,佢哋將挑戰100公里山路賽、拉A320客機、渡海泳同挑戰飛行大賽等。

日前佢哋喺觀塘接受專訪嗰陣,順便提早開聖誕派對,互寸互窒玩到癲。Hidy話:「今次我係嚟消耗體力,渡海、毅行都有我份,但係用腦嘅嘢,我冇參與過。」子豐笑指Hidy只得體能:「好似整飛機嗰啲,我哋叫佢千祈唔好搞,佢拍落嚟真係好痛,我同佢講千祈唔好同個仔掃風。」身旁的Hidy即笑謂:「我真係冇同個仔掃過風喎。」

而早前拍攝挑戰飛行比賽時受傷入院嘅Renci說:「其實我係自告奮勇做機師,戴哂頭盔、救生衣,但係發生咩事真係冇印象。」佢地即踢爆阿妹見Renci受傷即緊張到喊,不停叫佢「唔好瞓」,幸好現時Renci已痊癒。Renci仲話冇後悔參加呢個活動:「因為我都冇哂記憶,不過畀我揀都會玩多次,因為隻飛機係一齊砌架嘛。」

Dixon上輯就畀佢哋笑係「肥海蔘」,佢就話自己今輯因為游渡海泳而fit咗,點知全場即時靜哂,冇人和應。講到因為《SE7EN》而為人開始認識嘅阿妹,大家即刻話佢愛心爆棚,不過有份執著,駱振偉話:「邊有人一定要睇哂說明書先做嘢架?係我哋用雪條棍砌飛機模型,擺明係郁唔到,都一定要跟住佢方法做!」阿妹笑謂:「佢哋次次都鬧我,但係鬧完就會就我囉。」佢哋仲話拍節目冇低線,好似行毅行咁,連續行48小時,2日2夜冇瞓過,不過大家好體現到團隊精神。

佢哋雖然全程狗咬狗骨,其實真係好好朋友,私底下仲約咗參加障礙賽,佢哋話因為愈玩愈上癮:「本來都唔想拍第二輯,而家想繼續拍落去,最想可以一齊出trip去澳洲玩X-game。」

採訪:盧妹
攝影:沈健程

服裝:Lily brown(陳俞希)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載