蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月28日

【肺癌期間全心工作】霑叔咳住填詞打氣 軒仔:辛苦程度從未聽過

68,828
(資料圖片)
建立時間 (HKT): 1228 17:05

張敬軒日前接受咗吳雨喺商台節目《娛樂大哥》訪問,今日就播出第一part,軒仔喺訪問入面講番起同由黃霑填詞嘅《Blessing》,原來呢首歌,係軒仔同黃霑首次,亦係唯一一次同黃霑接觸。

霑叔一向煙不離手,直至01年發現患上肺癌後,低調醫病,軒仔今日講番起,原來當時搵霑叔填詞極唔容易,軒仔話:「嗰時外間根本唔知道霑叔有病,但呢首歌對我嚟講,霑叔填詞係不作他選,佢嘅氣魄、情懷,係霑叔獨有。」

軒仔透露當年透過環球版權公司聯絡上霑叔太太,以誠意打動,而霑叔知道後一口答應填詞,軒仔仲話同黃太通過電話,黃太開出一個條件,就係唔可以催霑叔交稿。

霑叔喺病住嘅呢段期間,原來冇放低過軒仔嘅委託,軒仔話大約過咗個幾星期,收到同事急call,要佢即刻返公司收「一份好重要嘅Fax。」軒仔返到公司先知,原來份Fax就係霑叔嘅手稿:「我覺得佢好厲害,佢先抄咗一份簡譜,簡譜下面跟一份歌詞,寫咗日期、簽名,佢嘅字特別靚,好似藝術品一樣,感覺好震撼,現在我仲珍藏住!」

軒仔雖然無緣親身接觸霑叔本人,但有機會同霑叔講過電話,軒仔形容呢次通話令佢畢生難忘:「喺錄呢首歌之前,我同霑叔通過電話,亦係唯一一次的電話。喺嗰次通話入面,佢咳咗一次,我呢生人都唔會忘記呢種咳嘅辛苦程度,我從未聽過,好記得呢通電話令我心寒。我同佢講:『霑叔,你唔舒服就多啲休息。』佢仲講番:『得啦,得啦,冇問題!』」

喺收線之前,軒仔仲收到霑叔嘅鼓勵:「臨收線前霑叔仲問咗我一句:『你係廣州嚟嘅,係咪?』我話係,他就同我講:『我都係廣州人,畀心機!』」可惜軒仔完成呢首歌之後嘅幾日,霑叔就與世長辭,趕唔切聽《Blessing》製成品。

另外,吳雨喺節目入面講起當年神劇《大時代》首集幾隻蟹仔一齊跳樓,原本仲有幾個血腥鏡頭,不過都係太過震撼,要韋家輝出手剪番走,節目最後都要由晚上7點推遲到9點先可以播。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載