蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月28日

【肉搏被姦都救唔到】《巾幗3》平安夜收視14.9點 創無綫劇新低

89,442
建立時間 (HKT): 1228 22:10

大台重口味劇《巾幗梟雄之諜血長天》播出一個多星期,事先張揚強姦肉搏戲連場,但內容真係睇到人O晒嘴,劇情cult 到無輪,歷史時空錯漏百出,就連嗰啲成日話「睇電視啫唔好咁認真啦好唔好呀」嘅觀眾都頂唔順,咁呢套劇收視又點呢?

過完四日長假,大台上周收視成績表今日出爐喇,由於星期一、二都係公眾假期,所以收視結果今日先至公佈。《巾幗3》開播首周,即12月19日至23日,平均收視得有20.6點(約134萬人次收看),以為咁嘅收視就係低?少年你太年輕了。

啱啱過去嘅星期六,即12月24日平安夜,《巾幗3》嘅收視跌到得番14.9點,計番即係得934,704人次收看,仲創埋大台自家劇收視嘅新低。

無綫今年實施黃金劇播足七日嘅策略嚟救收視,但天氣不似預期,自家劇收視屢創新低,特別就係死喺周六時段。9月24日(星期六)播出嘅《律政強人》有15.2點(約99萬人次收看)收視,上月12日(星期六)嘅《來自喵喵星的你》好啲啲,收視錄得15.6點(約101萬人次收看)。

不過咁,卡士強勁嘅《律政強人》,開播首周平均收視都有23.3點(約151萬人次收看);至於湯藥都唔換一條橋拍兩個劇嘅《來自喵喵星的你》開播首周平均收視亦有24.2點(約157萬人次收看)點收視。《巾幗3》呢?係首周平均收視係20.6點.....

補充番,大台劇嚟講,收視最低嘅仍然係外購劇《瑯琊榜》,喺6月4日(星期六)播出嗰集,收視僅得14.4點(約93萬人次收看)。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載