蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月29日

【除夕夜搵地方倒數】新年新金句 明福俠破例東港城Countdown

21,757
建立時間 (HKT): 1229 19:15
無論係想睇黎明定明福俠,今年都可以去東港城倒數。(資料圖片)

後日就係大除夕,去邊度倒數好呢?仲未諗到,等《蘋果》畀啲貼士大家啦!

為咗迎接2017年,今年倒數活動都好熱鬧,商場方面好揼本請到韓星同天王撐場,咁就同大家數吓有乜嘢選擇先!

煲劇韓迷一定留意到《嫉妒的化身》男主角高庚杓,佢會喺後晚12點去銅鑼灣世貿中心同fans迎接2017,oppa一場嚟到,梗係唔少得玩貼身遊戲同送禮物,高庚杓呢次係首次嚟香港出席活動,到時仲會上台唱歌助興。同場仲有「坤哥」吳業坤、準人妻王君馨,同女子組合少女標本,近日蜜運中嘅「標本女」袁紫僑(CoCo)上星期先猷君見完四太,相信CoCo完騷後要即刻人肉速遞搵番男友過元旦。

如果唔係韓迷,大家不妨去見「明福俠」黎明(Leon),佢當晚10點半就會去將軍澳東港城出席「Cheers To 2017 Countdown Party」,Leon以往甚少去呢啲活動,今年Leon迷可以有偶像陪伴倒數,仲有機會聽住金句等2017來臨,同場仲有鄭俊弘同劉佩玥o添。 

同Leon錯開嘅,就有「流氓皇帝」馬國明微服出巡,佢會喺將軍澳新都城中心同觀眾玩遊戲兼派禮物,除咗皇上,仲有洪永城同唐詩詠以情侶檔出騷,拍拖賺錢兼過埋節。

至於「渠頭」王浩信同陳自瑤呢對恩愛夫妻,大除夕就去到鑽石山荷里活廣場,連同胡諾言、陳凱琳同樂印姊妹等喺嗰度同觀眾過節,佢哋會分開唔同時段上台表演,但當倒數一刻就會齊齊上台慶祝。

如果唔怕凍,仲可以揀戶外倒數,到時喺尖沙嘴碼頭就會有Supper Moment、周志康、林師傑同糖妹等一齊過,佢哋當晚會喺街頭開派對,邊唱歌邊同大家慶祝。

睇落咁多選擇,揀到未?o依家仲有時間可以慢慢揀,但最緊要留意埋交通情況,早啲去霸定靚位喇!

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載