› 選擇地區
三藩市
紐約
洛杉磯
其他美國地區
香港 台灣 北美
 
2017年01月14日

【不斷更新】錄完第一集即被消失! 傳張敬軒《我是歌手》排名尾二

最後更新: 0114 15:32 / 建立時間 (HKT): 0114 13:35

【新增內容】
張敬軒幾日前先宣佈參加湖南衛視《我是歌手5》(現改名《歌手》),仲喺微博發表千字文,表白愛國心跡!但軒仔似乎兩邊都難討好,除咗香港網民不屑外,連強國網民都直斥佢前後兩個樣!

相關新聞:【錄《歌手》第一集被cut】軒仔排第4出場唱《吻得太逼真》

軒仔早前傳入大陸封殺「黑名單」,其後軒仔發表一個中國偉論,更成功參加《歌手》比賽一展歌喉,點知最終都疑被出局!!!!周二(10號)嗰晚揀咗《吻得太逼真》,傳軒仔排名尾二!台下嘅氣氛都好好,點知到咗噚晚凌晨,官方微博突然刪走晒軒仔嘅所有消息(新聞連結: http://bit.ly/2iqqU1l )。

據聞軒仔早前已錄影第一集,大膽挑戰樂壇天后林憶蓮、杜麗莎、蕭敬騰領銜嘅獅子樂團等唱得之人。節目原定下星期六(21號)播出街,但今日突然有大陸網民「芒果女漢子」爆料,指軒仔會被抽走所有內容,包括唱歌部份,連同嘉賓互動都會cut埋,如果刪唔走就會用馬賽克遮樣。

相關新聞:【全城熱話】軒仔被退出《歌手》 網民:祖國媽媽大腿不是你想抱就抱

被抽走原因不明,《蘋果》記者致電英皇高層Mani就未有否認事件,只話﹕「稍後統一回應。」

不過睇番《歌手》節目官方微博確實刪走晒有關軒仔嘅一切,而軒仔早前喺微博貼咗關於影《歌手》海報嘅post,原本係要感謝一班團隊,但o依家都冇埋,話「此微博被作者刪除」;而《歌手》節目組又下旨,叫其他歌手當冇事發生,仲可能因為少咗個參賽歌手而改賽制,或者搵其他歌手補上,似乎大家想將一切證據「消滅」。

軒仔喺近一個鐘頭前,又將「陣地」移番去instagram,佢貼咗張由床上影嘅窗邊相,相中透現出一線曙光,留言﹕「睡到自然醒。」唔知係未知發生咩事?定係真係無咩所謂?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載