蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月17日

【冇諗過自己醜樣】兩度奉子成婚 車保羅靠把口組甜蜜之家

305,164
建立時間 (HKT): 0117 00:02

現年57歲嘅車保羅(原名吳溟蒼)19歲時同第一任太太奉子成婚,育有一女吳茵茵,但囡囡出世冇幾耐佢哋就離婚。到咗90年代,吳茵茵個女、年僅5歲嘅李津兒,喺2003年1月於一宗喺銅鑼灣發生嘅車禍中不幸身亡。(新聞連結: http://bit.ly/2jVUzVc )

相關新聞:【未做過商台看更】車保羅個名有段故 差少少變咗叫「疱疹」

25年前,車保羅同現任菲籍太太Inday結婚,原來Inday當年係車保羅家中女傭,忙於喺內地做嘢嘅車保羅搵Inday去屋企執頭執尾,就係咁,兩個人撻着咗,仲奉子成婚。車保羅日前接受專訪時話:「點解我帶女人返去,佢(Inday)好似有少少呷醋嘅?有一晚風雨交加,就搞掂咗啦,共諧連理,到今時今日。係25年前,佢陪我走過最慘的日子,風光日子就冇乜。」車保羅同Inday生咗一子吳卓偉,佢仲跟老竇一樣改英文名做Paul(Paul Jr.)。

講到車保羅兩段婚姻都係奉子成婚,佢話:「我係個好有責任嘅人,女方一話有咗,我話冇問題,有咗咪生囉,嗰時又冇錢擺酒,求其一家人食餐飯算。嗰時生咗一個女,o依家我都係阿公輩,佢嗰邊已經前後生咗3個(津兒之後再生咗一仔一女),就快我個仔又揼一件,預計1月。」

相關新聞:【瘦虎肥龍再現】施介強全程扶持 車保羅讚星爺勁Nice

車保羅有6呎3身高成個人標誌,但阿仔Paul Jr.「青出於藍」,有6呎7高,o依家喺機場做運輸工作,Paul Jr.唔單止遺傳咗老竇高嘅基因,仲似埋老竇奉子成婚o添!Paul Jr.喺月前已同菲籍女友Gerlie註冊,上個月25號就喺車保羅元朗屋企開結婚派對,預計今個月底就會正式升任爹哋。車保羅笑住話:「有其父必有其子吖嘛!據知係仔嚟嘅,我老婆買晒嘢㗎喇!」

車保羅太太Inday今年55歲,喺一間飛機餐供應商度打工,見佢不時喺facebook晒兩婆公嘅甜蜜生活照放閃。車保羅提起現任太太就話:「係緣份,我哋兩個相敬如賓,未嘈過交,永遠每一刻我見到佢都係笑。」難怪車保羅話最想買粒鑽石o氹老婆:「呢個我promise咗佢20幾年都未做到,我同老婆講膽石好唔好?佢話:『啋,I want real diamond。』」

記者講笑問佢覺唔覺自己其貌不揚都有女埋身時,車保羅話:「可能我把嘴得啦,識講嘢。我從來冇諗過自己醜樣,I'm OK,我有我talent,我有我嘅格,但當然唔係衰格啦……有我喺度先至映得其他人handsome,I am ugly,but my heart is very good。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載