蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月17日

【瘦虎肥龍再現】施介強全程扶持 車保羅讚星爺勁Nice

94,344
建立時間 (HKT): 0117 00:02

一個身高6呎3,一個體重曾經超過300磅,今年57歲嘅車保羅同大佢兩年嘅施介強(肥施)呢對孖寶,於90年代接戲接到手軟,除咗歷蘇主演嘅《香港也瘋狂》同《危情》等等之外,最令人深刻的當然是《審死官》中的瘦虎肥龍。

相關新聞:【冇諗過自己醜樣】兩度奉子成婚 車保羅靠把口組甜蜜之家

呢對孖寶已經10年冇合作,佢哋日前喺元朗重逢,肥施一見車保羅即刻摸對方下巴,佢話早排傳出車保羅死訊,嚇到佢即刻打電話問清楚:「梗係打畀佢啦,如果兩次留言或者電話cut咗,咁就係真㗎啦!」車保羅聞言笑住話:「I'm still alive。」佢哋仲相當有默契咁整鬼整馬,未見生疏。

當年佢哋一肥一瘦形象相當出位,原來佢哋嘅合作,係同早年車保羅同一位圈外人拍嘅東芝廣告有關,車保羅話當年嗰個拍檔本身有正職,但唔想入呢行,啲人就搵肥施頂上,一肥一瘦啱啱好。不過,又因為呢個廣告,搞到肥施冇得做另一品牌嘅代言人,肥施話:「日立搵我拍廣告,造晒型、試晒鏡,日本總裁好like,但香港總裁話東芝味太重,ban咗。」佢哋兩個當年合作拍戲,最忙時期試過一日三組,但由於佢哋身材異於常人,造衫好難,所以試過呢套戲同另一套戲借衫用,互相幫助。

相關新聞:【未做過商台看更】車保羅個名有段故 差少少變咗叫「疱疹」

1981年車保羅喺麗的青春劇《IQ成熟時》做男配角,當年仲做緊特約演員嘅周星馳,喺劇中飾演向車保羅同鍾保羅收保護費嘅壞學生。不過,相隔11年之後,周星馳已經大紅大紫,拍《審死官》時輪到車保羅客串做衙差瘦虎。講到同星爺嘅合作,肥施同車保羅都讚好友,車保羅話星爺好nice,冇鬧過佢哋;肥施則話佢哋同過好多導演合作,以《審死官》導演杜琪峯最嚴格:「每次打燈,杜Sir、達哥(吳孟達)同星爺3個就會入去砌四圈,但佢哋唔係開枱,係度下一場對白,嗰時合作好愉快。」

車保羅話自己經歷過低潮,體會到好多圈中人都好現實,惟肥施例外:「肥施好似醫生定期覆診咁,久唔久會打電話嚟問我死得未。有啲外國製片嚟香港,佢一定關照我,叫我去casting。」原來早年車保羅拍嘅西片《特務戇J之救國大業》(Johnny English Reborn)同《Push》,都係肥施叫車保羅去試鏡。

肥施話:「每次睇到佢啲新聞,我都有打電話問候,原來幾多不幸事,次次係我打電話畀佢。有一次好震驚,就係銅鑼灣佢孫女嗰單……佢求生同生存能力好高,乜嘢都肯做,唔係個個得。」車保羅亦話:「永遠正能量,我係跌到去最低,然後由最低慢慢上,珍惜每一天,每日擘開眼,我又賺咗一天,我已經好開心。」佢話就算有唔開心事,飲兩罐啤酒又會落咗啖氣。

現時體重約220磅嘅肥施,於81年加盟新藝城,係新藝城第一個合約演員,同年佢開始喺香港電台做節目,88年至90年曾經加盟亞視拍劇,呢10幾年佢喺港台轉做節目編導,全職做幕後。講到唔做幕前嘅原因,肥施話:「我喺電台做全職編導,拍嘢要申請,所以好多人怕煩而少搵你,同埋咁樣我可以專心做一樣嘢。」講到感情生活,肥施坦言一片空白:「冇拍過拖,我唔係攣㗎!經常有人話介紹女仔畀我識,到今時今日都有,話有個人照顧吓好,但自己知咩事,又冇車又樓,唔好累人。」

呢對沙煲兄弟希望將來可以再合作,車保羅臨別仲同肥施互相勉勵:「最緊要你保重身子,朝朝起身擘開眼又賺一日!我哋以前開工好多嘢傾。」肥施亦回敬:「一個人最緊要知道自己乜嘢位置、乜嘢身份,唔好夾硬或勉強,只會令自己唔開心,又或者人哋更加睇唔起你,要人哋respect,最緊要做番自己。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載