蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月18日

【唱足十年冇人識】掟鏢好搵過歌星?官恩娜師妹做全職鏢后

111,540
建立時間 (HKT): 0118 07:00

「同期嘅新人就多喇,周柏豪啦陳柏宇啦……大家喺唔同嘅平台上都有唔同嘅認定。我又冇話特別好羨慕,不過見到同期佢咁成功,其實我係好欣慰。」

梁雨恩(Cathy),2007年孭住官恩娜師妹個名出道;中大酒店管理系畢業,人靚聲甜又有學識,星途理應一片光明。可惜出道十年,代表作欠奉,最令人深刻可能只係同陳法拉前夫薛世恆嘅緋聞,又或者曾經畀記者影到兼職賣麵倒垃圾。眼見同期嘅陳柏宇及周柏豪都事業愛情兩得意,現年31歲嘅Cathy就表示感到非常欣慰,並冇葡萄,皆因佢已搵到自己嘅方向—飛鏢。

四年前,機緣巧合下,Cathy開始接觸飛鏢,佢更加一玩就愛上呢項運動:「命中目標個感覺囉,當你掟到兩個紅心,就會有個動畫彈出黎,咁你自己可以打啲祝福語。嗰時啱啱開始掟,我就好想自己嗰個動畫可以飛出嚟。」就係因為呢個咁單純嘅目的,令Cathy好畀心機去練鏢。對比起樂壇,對飛鏢嘅付出終於得到收穫:「今年發揮都唔錯,六站裏面有四站攞左champion,所以女子排名裏我係攞左第一囉。」唔止做咗香港鏢界一姐,佢更加喺首屆「Soft Darts World Cup 2016」擊敗美國隊奪冠,為港爭光!

雖然口講冇葡萄,不過Cathy坦言亦曾經執着過,幸好飛鏢令佢學識放手:「適當嘅時候放手,有時捉得太緊,反而會睇唔到身邊有更加好嘅風光。可能以前自己都會有好多期望或者想做嘅嘢,o依家就覺得我唔係淨係單向唱歌唱歌唱歌。佢嘅規則只係你企喺個throwline後面,然後你中個靶,只係咁簡單。但係樂壇上嘅規則或者人事會更加複雜。」

放低執着,諗通咗嘅Cathy明顯開心咗;拎起支鏢,瞄準鏢靶個樣更加比以前更有性格,更吸引。身為香港鏢后嘅Cathy更希望大家可以對飛鏢改觀:「玩飛鏢唔一定係蒲,飛鏢都係一種運動。一個地方唔係淨係經濟好先至會好,其實飛鏢或者唔係飛鏢,運動係佔一個好重要嘅角色。如果政府係有個咁嘅眼光去見到其實運動係重要嘅時候,我相信香港會更加好,唔係淨係去睇dollar sign。」

採訪:植詠珊 (Cathy)
攝影:Neo、馮峰
剪接:Roy
編審:Kaman
場地:Darts Market

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載