蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月18日

【拎牙簽籤筒掟麥提爽】佘詩曼怒爆黃子華:佢成日整我!

127,334
建立時間 (HKT): 0118 18:20

今日黃子華同古天樂、佘詩曼等到中環出席一開幕活動,黃子華講下近況啦,佢話過完農曆年之後就會開工拍新片,片種屬動作笑片,女主角係佘詩曼。「我嘅角色係007嘅師兄,我冇冧把㗎,犀利呢?」佢又話依家當務之急,係要令自己「唔好太肥亦唔好太瘦,要啱啱好去適合呢個角色。」但佢笑言成個農曆新年要食四十餐,「總之我嘅食量係比你想像中更加為食。個腦知道飽但個人仲好似金魚咁樣繼續食,所以幾大挑戰。」會否操肌?子華笑道:「我保證唔會令觀眾難受,所以你哋唔會見到我啲肌肉。」

相關新聞:【《樹大招風》攞好多獎】施政報告倡資助電影製作人 古仔:希望之後可以再多啲

至於佘詩曼嘅角色,佢就話係「香港極高權力嘅官員」,係咪奶媽林鄭嗰種?黃子華笑言:「都有佢咁高層0架,你哋覺唔覺得阿佘有咁踲威勢吖?」

之前黃子華同阿佘合拍過劇集《絕代商驕》,麥提爽同三水妹最後都有錫錫,咁新片又有冇呢啲談情說愛場面?「呢啲避免唔到嘅。(咀戲都避免唔到?)男演員喺呢方面好被動,要睇女主角肯做啲乜。」記者笑言床上戲都係「動作片」喎,子華即笑笑口謂:「你想多了。呢一部特務電影,007有嘅我哋都有,007冇嘅我哋都有。」

相關新聞:【男方有問題?】王宗堯兩次拍拖唔夠半年被飛 舊愛:等佢自己消化下先

同場嘅佘詩曼就話戲中要蝦子華,阿佘話之前有開會,有問佢嘅底線,有問佢有咩做得,有咩唔做得,阿佘就話唔好整佢條頸囉,因為之前條頸傷過。問到係咪唔可以拍親熱戲?阿佘諗一諗答:「應該唔係好嚴重啫,始終呢部係喜劇。」可擔心子華爆肚招架不住?佢就話:「之前有拍劇(即《絕代商驕》),子華都成日整我,我還唔到口,咪還手囉!試過忍唔住呢成個牙籤筒車埋去,之後我郁少少手佢都會即刻縮囉!係當時開會子華重提番,我先記得,原來佢咁小器㗎!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載