蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年02月05日

【冇名次又點啫?】落選即拍劇 郭少芸同屆佳麗星途最閃

149,921
建立時間 (HKT): 0205 00:02

郭少芸係1992年年度港姐候選佳麗之一,雖然入到12強,但無法晉身最後前5名,好彩,佢唔係空手而回,佢同當年冠軍盧淑儀、李思林、雷施敏、李秋林一齊攞咗個「最佳合作獎」,叫做有少少「揸拿」。

相關新聞:【做過賺錢老闆娘】遇SARS蝕到入肉 郭少芸三間餐廳執晒笠

雖然無緣三甲,但郭少芸喺同屆佳麗中,星途叫做最閃嗰個。佢落選後隨即加入無綫,參演當年嘅劇集《火玫瑰》、《大時代》同《九反威龍》等,初出道嘅佢雖然戲份唔多,但喺短短3年已經參演逾15部劇,到1995年,郭少芸憑《真情》中嘅李多欣(即主角劉丹演嘅「叉燒炳」個幼女)為人熟悉。至今拍咗約60組劇,當中不乏長篇處境劇;另加逾10套電影等演出,郭少芸嘅曝光率一直都唔低,名氣亦長在。

反觀同佢同屆啲佳麗,較為人認識嘅係冠軍盧淑儀,不過,佢喺當選冇幾耐就同李克勤拍拖,其後更退出娛樂圈,兩人於06年結婚,盧淑儀婚後專心相夫教子。家陣佢久唔久會喺社交平面晒吓啲生活照,星途方面……可謂冇代表作。

相關新聞:【專演惡女人】「倀雞英」郭少芸捱足廿年 變《愛.回家》醒目孻姑

至於亞軍同季軍劉殷伶同張雪玲,前者起初都有參與幕前演出,演過郭富城音樂特輯,卸任後返美;張雪玲則有消息指佢,卸任後轉投美容界,並有參與慧妍雅集活動。而同屆參選嘅姊妹檔李思林同李秋林,同樣係冇名次,佢哋喺1997年同胞妹李玟(CoCo)合唱過《我的翅膀》,並收錄於CoCo《每一次想你》專輯中。李思林後來轉做CoCo嘅經理人兼化妝師。

喺1992年嗰屆仲為人認識嘅,仲有得到第4名嘅梁思敏,落選後接拍三級片《情不自禁II之霎時衝動》,成為史上首位港姐出身嘅三級女星,戲中陶大宇為佢除bra嗰一幕成為經典之一,其後再拍過數部電影後便退出娛樂圈。而張蘭英亦喺落選後拍過數部電影,其中喺1993年電影《香港奇案之強姦》(邱淑貞、吳雪雯、任達華、鄭浩南主演)中,有肉搏鄭浩南場面。

另外,當年熱門之一張玉華落選後推出過一隻EP,都曾經做過歌手;而蕭玉燕落選後入過無綫,長年做二打六。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載