蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年02月08日

【數度離合】拍拖3年幾 麥明詩林作轉玩地下情

29,765
建立時間 (HKT): 0208 00:02

麥明詩同林作嘅戀情,可以追溯番去3年幾前,麥明詩於前年正參選港姐的麥明詩出席林作晉身大律師行列的慶祝會,並以女主人身份招呼賓客,當時已拍拖兩年。同年9月麥明詩當選港姐冠軍,隨即被揭與林作拍拖,不過,麥明詩疑怕影響星途,竟將林作「降呢」做朋友。(新聞連結: http://bit.ly/2ljnejD )

相關新聞:【繼藥房太子之後】麥明詩大隻仔友人係乜水? 張存華係樂視籃球評述

而林作亦都好識做,配合麥明詩,佢出席新店開幕禮時,大耍太極,話自己冇認過同麥明詩拍拖,就算被傳媒影到,佢都死撐話:「點先算係拍拖?又冇拖手冇打茄輪冇錫面,唔會喺公開場合囉,你哋都冇影到!」(新聞連結: http://bit.ly/2lkIINY )同年林作參與競選黃大仙區區議員,麥明詩不時被問點睇男友參選,女方都大方回答,喺選舉期間更現身為男友拉票,點票當晚亦有到場支持。(新聞連結: http://bit.ly/2kIuVTW )

到舊年5月,有傳林作母親為向阿仔催婚娶麥明詩,豪擲6,500萬買麥當勞道嘉年大廈3,400呎複式豪宅單位畀個仔娶老婆,間樓仲係林母現居嘅同屋苑同座數,方便照應。同月麥明詩參演無綫節目《星星探親團》時,三句不離「劍橋」、「十優」,被批「堅離地」,林作開腔為女友護航;而麥明詩亦以行為證自己冇離地,林作同朋友去踢波時,貴為港姐嘅麥明詩,幫男友等去買水做阿四。

相關新聞:【冧女必殺技】洗米華同Mandy曼谷過情人節 蕭正楠拖翠如BB沙灘睇日落

睇嚟風平浪靜嘅一對璧人,喺舊年6月起風浪!林作被《蘋果》讀者透過「爆相爆片」,踢爆佢趁麥明詩北上拍劇《賭城群英會》期間,喺銅鑼灣街頭向低胸索女「A貨麥明詩」余穎洋(Victoria)攞電話嘅相,麥明詩更以「關係講信任,要𥄫住嘅話冇意思。」作回應(新聞連結: http://bit.ly/1YlzW14 ),其後女方更被指爆喊承認與林作情已逝。(新聞連結: http://bit.ly/28JnS7U )

喺麥明詩同林作冷戰期間,有傳「鴨王」何浩文乘虛而入,林作出動到高呼「我愛麥明詩」嚟箍煲,適逢麥明詩媽咪喺暑假推出新書,林作又出口術幫auntie谷書推廣。可惜林作箍煲失敗,麥明詩開口認分手,林作大玩語言技巧:「我同佢從來冇喺任何場合話係男女朋友關係」。到9月,林作再被「爆相爆片」,指佢趁麥明詩喺巴西做奧運主持期間,約埋一班比堅女索女及男友人喺淺水灣開P。(新聞連結: http://bit.ly/2jXRCz2 )

正當以為佢哋分開啦,點知……麥明詩同林作被撞破一齊過中秋節,同林媽媽食飯做節(新聞連結: http://bit.ly/2ijBita ),又被影到兩人去買戒指,疑似轉玩地下情,但林作避談戀情,只承認同麥明詩保持聯絡,亦清楚對方行蹤,麥明詩喺舊年10月被發現揸林作架車喺紅磡同男友短敍。

似乎掟煲唔掟蓋嘅麥明詩同林作,女方身邊不斷有觀音兵出現,包括舊年10月同佢一齊開萬聖節P嘅新兵、舊年年底冒起嘅大藥房太子Thomas Chong,但兩個月前麥明詩生日,林作疑似有份出席,而上個月林作與母一同接受《蘋果》訪問時,林母「轉軚」勁讚麥明詩「師妹」、2016年度港姐冠軍馮盈盈,搞到林作大爆阿媽恨有個港姐新抱。(新聞連結: http://bit.ly/2kDhoKP )

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載