蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年02月13日

【原來係咁!】江嘉敏冇份宣傳live喊晒口 男友曹震豪:佢係感動唔係委屈

13,407
攝影:卓寶花 (蘋果日報)
建立時間 (HKT): 0213 15:00

曹震豪噚晚喺尖沙嘴一間酒吧舉行新EP《detention》音樂會,台上玩樂器之外,仲唱其他歌手嘅歌,佢話之前做過類似咁嘅音樂會,今年就係第一次搞:「2016年前嘅4年我停咗工作,因為一啲私人嘅事,冇做到幕前,今年會全力發展,去年開始接觸拍劇、MV、微電影,出奇地觀眾反應好好。」

噚晚Joey Tang鄧建明去咗捧場,本來話佢女友江嘉敏都會到場,不過最後都唔見有現身。震豪話:「女友平時都好乖,盡量都會嚟支持我,之前搞生日會佢都專登嚟。」佢又讚女友彈琴好叻,不過大家喺音樂上就難合作,因為之前試過夾band,但個感覺怪怪哋,所以暫時都唔會再合作。

講到江嘉敏拍大台劇《親親你好媽》做江美儀個女,不過大台就冇搵佢做宣傳,搞到佢喺網上live宣傳時喊晒口,問到知唔知女友係咪覺得好委屈?震豪就解釋:「女友喊唔係因為呢件事,我有睇live畫面,佢只不過一路live時,有啲人好支持佢,問佢嘅嘢有啲唔識答,睇到網民咁支持,又戥佢唔抵,見到咁多人錫,突然好感動喊咗出嚟啫!而並唔係委屈喊。」

覺唔覺得女友好慘,震豪話:「戥佢唔抵就梗有㗎啦!藝人個心需要強大啲,做藝人唔容易,要有能力接受起伏同波折,今次對佢嚟講係一種壓力,從而多學習,學習係磨練,唔好唔開心。」震豪仲鼓勵女友話,想佢明白,自己都經歷過低潮,相比之下,女友經歷嘅已唔算係啲咩嘢:「低處未算低,每次有呢啲機會,都係令自己反彈嘅好時機。」

咁有冇支持女友睇佢套劇?佢再話:「梗係有睇。」女友升呢做咗女神有冇壓力?佢笑話:「冇壓力,點會有壓力呀?不過佢最近多咗工作,忙咗好多,有啲明明安排咗兩個人一齊做嘅嘢,未必再做得到。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載