蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月03日

【獨家】裕華掃平貨 85歲夏春秋潮玩英倫風 最型六合彩伯伯

192,454
建立時間 (HKT): 0303 00:04

相信每個香港人,曾幾何時,總會有一個中六合彩嘅夢!

講起六合彩,當然要提吓人稱「六合彩之父」嘅夏春秋(冬叔),冬叔今年已經80有5,係第1代六合彩主持。自從冇主持六合彩,冬叔同老婆過住優哉悠哉嘅退休生活。日前讀者金先生透過《蘋果》嘅「爆相爆片」,見到冬叔搭港鐵由調景嶺站到觀塘站。

相中所見,戴住頂啡色「賊仔帽」嘅冬叔,外披同色外套同皮鞋,再戴上一副金絲眼鏡,拎住國貨紙袋嘅佢,出奇地散發陣陣英倫紳士氣息。據金先生表示,當時車廂中有唔少人認得冬叔。金先生話:「有個上咗年紀嘅男人走埋冬叔身邊同佢打招呼,冬叔好友善同佢say hello,走嗰陣,冬叔都有同佢講bye bye,嗰日見佢精神好好,係落車嗰陣,行路就慢慢行。」

《蘋果》事後打俾冬叔,估唔到今年85歲嘅佢,不單講嘢中氣十足,觸覺緊貼時事,仲識得講吓潮語搞吓gag,老人家風趣搞笑程度,拍得住佢個女吳君如。

冬叔就話:「老人家最緊要個心境唔好out,着衫都係㗎,以前成日俾對仔女話我着衫冇taste,有次着件背心,阿仔(吳君祥)就問『老竇,仲乜你着呢件衫呀!呢件老土啲噃,著得新潮啲』我呀,就最接受意見,最講民主,既然佢哋有意見,我咪跟吓佢哋睇法囉,咁o依家着衫,都會睇吓雜誌自己襯吓先出街。」

冬叔透露,自己着裇衫,唔鍾意冇口袋,因為平時習慣會放八達通卡同支筆喺袋中,亦唔會揹袋,因為唔夠型、唔夠靚,說時都係有啲嫌棄,仲玩食字gag:「唔孭咪唔孭囉!」至於點解鍾情國貨,冬叔就話:「通常我都係去永安、裕華嗰類,因為裕華有時啲size比較啱我,細size有時啱我啲。你知裕華始終都係中國人,大陸出,嗰啲尺碼比較啱我。如果係外國嚟,好似先施,專賣歐洲嚟嗰啲,佢冇細碼嘅,細碼都好大件,條袖都長到好似殭屍咁,咁你話著嚟做咩?」

至於入貨時機,精打細算嘅冬叔答:「我冇特別幾時入貨,通常都係減價嗰陣同人去搶,剩番啲細碼中碼,啱心水咪去買囉,唔啱我咪唔買囉。」

問冬叔每日用多少時間襯衫?冬叔話:「冇幾耐㗎,今日諗住著藍色,咪著藍色嗰啲囉,想著啡色咪啡色,想著棗紅色就棗紅色,想著墨綠色就墨綠色,唔使襯好耐嘅。」冬叔笑言好少同太太襯情侶裝出街,總之各自有自己style啦!

貪靚又講究嘅冬叔,原來家中儲埋5、60頂各式各樣嘅帽,仲有個專櫃擺放。「有不同style嘅。有時戴咗之後,有啲人話:『嘩!冬叔,你頂帽幾好喎!啱我喎!』我又送咗俾佢。有時飲茶,呢個見到話鍾意喎!o依家好多老人家都鍾意戴帽㗎啦,我就更加要戴帽啦,我又冇乜頭髮,要戴帽出街。我個女有時去英國,唔知買乜嘢俾我,我叫佢唔使買衫俾我,因為未必啱我size,帽就最啱。我個仔去旅行又買,啱就買俾我。」冬叔仲有個箱,用嚟收藏帽。

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2018 AD Internet Limited. All rights reserved. 版權所有 不得轉載