› 選擇地區
三藩市
紐約
洛杉磯
其他美國地區
香港 台灣 北美
 
2017年03月10日

【真係多得他】林憶蓮王菲92年合唱被搜尋 Wyman:忍唔住認一次叻

建立時間 (HKT): 0310 12:22

喺90年代娛樂圈百花盛放,無論喺電影、電視同音樂,每一個範疇都有代表人物,喺音樂方面,當時四大天王劉德華、張學友、黎明同郭富城幾乎雄霸咗樂壇,不過女歌手方面亦唔輸蝕,嗰陣除咗梅艷芳之外,王菲、林憶蓮、葉蒨文、彭羚同埋關淑怡呢班後起之秀,亦都不容忽視!

不過時移勢易,0依家呢班歌手淡出嘅淡出,就算唔淡出,大部份時間都北上巡迴賺人仔,天后級嘅林憶蓮最近仲參加湖南衛視嘅《歌手2017》,同一班後輩爭第一名,噚晚錄影嘅第9集《歌手》,憶蓮嘅出賽歌揀咗王菲嘅《多得他》,唔少人聽到如痴如醉,仲發現喺1992年創作人音樂會裡面,憶蓮王菲曾經同台唱過呢首歌!

比賽之後憶蓮亦都有提當年合唱呢件事:「當年跟王菲唱這個歌的時候其實也很緊張,因為是現場表演,好不好要一次性決定。但是我覺得這種好的歌曲會讓歌手覺得特別有挑戰,用緊張的心情希望把它唱好。」

黃偉文(Wyman)今日喺fb亦有po當年佢哋合唱呢首歌嘅MV,佢仲留言話:「呢一幕,係我同 Kwok Kai Wah Wallace(郭啟華)度出來的。(其實當年成段林夕tribute,同91-95年商台各種大小concert的rundown,你看過的記得的903製作,絕大部份都是,因為當時公司根本無人肯度無人得閒度,得我同佢好中意度好唔介意度,所以一年三四十個show,得我哋兩個做晒creative咁滯,卻造就了幾年美好的回憶,和練功。也想不到這幾年的「少林寺」經驗,最後會造福了後來自己的 Concert YY。)(唔好意思,事隔多年,喺死無對證灰飛煙滅之前,真係忍唔住,好想好唔humble地認一次叻。請取笑。)」

唔少網民睇完之後,留言話:「呢幕當年震撼至今!多謝你!」、 「多做多錯,唔做唔錯。 但唔做就失去了學習及鍛鍊的好機會。」、「多得你地!我地至有咁美好的流行曲回憶!」

不過呢首歌又係出自「詞神」林夕嘅手筆,按照慣例,喺節目裡面「被消失」!難怪回憶總是美好的。


《蘋果》第十二屆金話梅電影選舉(Golden Plum)又嚟喇!由今日起,請在以下網址( http://campaign.appledaily.com/goldenplum2017 )投票,選出心目中的爛片之霸,截止日期係4月6日,賽果將於香港電影金像獎舉行前夕(4月8日)揭曉。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載