蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月12日

【維基一早穿晒劇情】《迷》田蕊妮同7個人反目 大結局入埋精神病院

115,551
最後更新: 0312 01:07 / 建立時間 (HKT): 0312 00:11

男主角戲份:
「與計穎妍有感情線,後為其男友,並被其利用,最後反目。」
「被屈德廣及李大興重用,後與屈德廣反目。」
「假裝包庇計穎妍,實暗中計劃調查她,後被計穎妍發現而反目。」

相關新聞:【今晚大結局】偽毒吳業坤「世界級演技」變笑話 嘥咗田蕊妮啲「氣」…

女主角戲份:
「陳之華之下屬,後被他冷待,最後反目。」
「鄧耀權之妻,與他不和兼被他威脅,後反目。」
「倪樂兒之母,與她不和,一度和好,最後反目。」
「與萬喬柏有感情線,後為他女友,並利用他,最後反目。」
「林家榮之師父兼上司,並利用他,後反目。」
「萬子瑜之偶像,後為她上司,最後反目。」
「林永星之前上司,被他針對,後反目。」
「於第30集發現萬喬柏的計劃後與他反目,其後被送入精神病院。」

究竟一個角色要有幾喪盡天良,先至可以由劇集第一集開始就不斷同人反目?咁,佢社交能力一係就好差,一係就EQ勁低,一係就………根本套劇係喜劇。

相關新聞:【同半桶水做對手戲】坤哥多謝阿田:好似湊仔咁湊住佢

呢套劇,叫《迷》。

老老竇竇,呢套劇,其實舖得幾有心思(開頭係…),黑色喜劇,三條線交錯重疊——鄭嘉穎、田蕊妮同金剛。可惜唔知係咩原因,定係因為劇中女主角冇乜點樣露,所以飾演田蕊妮個女嘅簡淑兒一死,就好似套劇完咗咁冇乜noise。

直至前晚。田蕊妮推咗吳業坤落街嗰集(其實唔係推,係掹開佢啲手指令其墮樓)大家先至驚呼:田蕊妮好正!喜怒哀哭都極有層次,就好似一波又一波攻勢咁,將觀眾帶入戲——但,正如King Jer個網民咁講,田蕊妮努力令你入戲,而坤哥就努力令你「出返嚟」。呢個留言極高汁。

呢套劇今晚大結局,噚晚更加係連播兩集。唔少觀眾都坐定定等田蕊妮帶來高潮,但原來高潮一早已過,噚晚第27集,主要都係鄭嘉穎同田蕊妮腦電波交流———用「畫外音」心聲獨白交代鄭嘉穎點樣諗計拆穿田,而田又點樣諗計防衛。兩位好似世界級影帝影后咁,可以喜怒不形於色、將自己心計藏得好好,即係話,無咩表情好睇。特別係鄭嘉穎……佢嘅木無表情,真係令人想打——218 5個0。

講番文章首段提及嘅「不斷反目」,其實係《迷》喺維基上嘅資料。唔知邊位高手,由劇集播出第一集已經喺Wiki穿橋,穿晒人物關係、邊個同邊個會死,邊個隊冧邊個,只係爭在未填第幾集發生……「反目」、「不和」一詞,出現次數多過大台劇集BBQ ending;而且明顯有位有心人keep住修改,例如填番集數落去啲窿窿,以及有所刪減,好似之前係寫田蕊妮會墮樓身亡,依家就刪咗。

最後,一句到尾,其實維基呢位仁兄(仁姐?),能用「反目」二字咁精闢咁寫晒成套《迷》劇情,先至係真正高手。

《蘋果》第十二屆金話梅電影選舉(Golden Plum)又嚟喇!由今日起,請在以下網址( http://campaign.appledaily.com/goldenplum2017 )投票,選出心目中的爛片之霸,截止日期係4月6日,賽果將於香港電影金像獎舉行前夕(4月8日)揭曉。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載