蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月13日
馬上成為壹會員

【入咗戲仔女見到都驚】冇信心做金像影帝 任賢齊:對手咁強其實邊有信心

建立時間 (HKT): 0313 06:30

任賢齊、張雨綺噚晚喺尖沙嘴出席「香港專業電影攝影師學會週年晚宴」,活動中頒發咗3個獎,分別由《寒戰2》嘅攝影師關智耀得到「年度傑出攝影獎」、張雨綺得「最具魅力女演員獎」、小齊就得到「最具魅力男演員獎」。

小齊話好鍾意呢種香港電影圈嘅凝聚力氣氛,雖然大家唔同協會,但好努力同團結。原來小齊喺台灣冇參加過呢類活動,佢笑話:「啲人知我住香港,所以冇請我,都幾失落。」問到今次嘅得獎感受?小齊話:「我諗攝影師喺鏡頭望演員係由唔同角度去望,所以我攞到呢個獎都好開心。」

講到憑《樹大招風》提名金像獎最佳男主角,小齊自言呢個角色同平時好唔同:「我冇接受專業戲劇教學,但我覺得可以變成呢一個人,喺生活上面由行路到去望人都入咗戲,仔女見到我都驚,行緊路都幻想緊自己有把槍。」拍完戲之後,都用咗幾日時間去調整心理,佢同自己講拍完就要抽離角色,而拍攝期間都唔敢接其他工作。佢話今次得到提名,心情既興奮又緊張:「等緊開獎嘅感覺形容唔到,啲人成日問我恨唔恨攞獎、有冇信心,其實邊有信心,對手咁強,有提名已經係對我嘅一個肯定。」問小齊到時會唔會帶埋屋企人出席頒獎禮?小齊笑話:「我自己去,如果拎唔到,唔知畀乜反應好,所以佢哋喺屋企幫我加油就得啦!」

張雨綺憑《美人魚》提名金像獎最佳女配角,今次又拎到呢個獎,問佢有冇增加得獎信心?佢話覺得幾驚訝:「不知劇組報了名,有點意外,能夠入圍很高興和期待。」佢仲笑話如果到時拎唔到獎唔好意思返屋企:「請大家幫我,讓我回家。」張雨綺話未知到時係咪同星爺一齊行紅地毯,但就好希望頒獎禮當日有好天氣:「希望天氣和暖,不要再下雨,因為第一次出席時下很大的雨,整身濕透,不想再出醜啦!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載