蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月15日

【消失的聲音】保全叔囡囡林芷筠離開配音界 網民不捨﹕好掛住懶洋洋

51,506
建立時間 (HKT): 0315 00:03

叮噹(多啦A夢)配音員林保全前年離世,直到今日仍有唔少人懷念保全叔嘅聲音。林保全嘅囡囡林芷筠童年時已不時出入配音室,03年更開始跟隨爸爸加入無綫配音組工作,配過《喜羊羊與灰太狼》嘅懶羊羊、《Smile光之美少女》嘅尾後清美,《閃電十一人GO銀河》嘅空野葵等等。

當年無綫要將多啦A夢重新選聲,更一度有傳芷筠係接班人,因為唔少香港人對保全叔嘅聲音太懷念,對芷筠亦有一份情意結,希望女承父業。可惜最後經無綫推薦後,日本方面揀選咗80後女生黃昕瑜接替保全叔,至今聽到嘅多啦A夢新聲音就係由黃昕瑜負責配音。

近日《蘋果》收到讀者爆料,指林芷筠今個月約滿後離開無綫配音組,而無綫官方網頁已將其名字剔除,有熱愛配音組嘅網民留言:「芷筠真係離開TVB配音,我覺得真係好可惜同好唔捨得,因為我鍾意聽芷筠配音懶羊羊同其他美少女角色,保全叔喺2015年1月2日過咗身,o依家連囡囡芷筠都要離開TVB配音,好似冇兩父女一齊配音,希望芷筠搭上新工作或者有機會返嚟配音界。」

其實芷筠喺入配音組前都演出過唔少劇集,包括《再見亦是老婆》、《烈火雄心》、《刑事偵緝檔案IV》等,有人揣測佢係想復出幕前做藝人,不過芷筠否認,噚日以短訊回覆傳媒,只簡單一句﹕「轉部門工作。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載