蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月02日

【ViuTV變陣】召喚女神李偲嫣…「毛」距離壁咚嚇親送禮仔

22,157
建立時間 (HKT): 0402 00:10

其實ViuTV今次配合變陣,都會推出好多新節目,除咗林雪主持嘅《林說金曲》之外,由今個月8號開始,逢星期六晚10點半至11點半,仲會有韋家華監製嘅《精裝送禮仔》。

相關新聞:【ViuTV明日變陣】周一至五晚晚播劇 韓孝珠X重量級白只獻身

呢個節目,玩法係先收集民意、再加以轉達,點轉達呢?就係化民意為心思,送上一份有寓意嘅禮物。有份收禮嘅十位香港人,分別係李偲嫣、王維基、河國榮、黃夏蕙、宮雪花、深水埗明哥、八両金、盧覓雪同梁思浩。

顧名思義,《精裝送禮仔》,送禮嘅係四條仔:王志安(Otto)、許博文(強尼)、歐偉邦(Pete)同英健朗(小占),佢哋嘅任務,就係先收集民意,再去挑選禮物,然後分別送到十位嘉賓手上。

但點解要送俾李偲嫣?

監製韋家華接受《蘋果》電話訪問時解釋謂:「佢係一個話題人物,有一啲中國人傳統理念,我哋收集民意嗰陣,好多人一講起佢,都會講個『刁』(諧音)字,所以我哋雕咗佢個像、好似成個正義女神咁嘅像送俾佢。」至於王維基,《精裝送禮仔》送咗個機械人俾佢,因為王生曾經話過自己好打得。

講番當日幾個主持送禮俾李偲嫣之前,竟然緊張到要飲酒壯膽,點知壯完之後個膽大得滯,即場教李偲嫣擺pose——李大姐之前嗰本P圖P到七彩嘅寫真集,令人猶有餘悸喎……結果好不幸,送禮仔合力推咗Pete歐偉邦出去,要佢同偲嫣BB擺個「壁咚」甫士。Pete湊近李偲嫣塊面嗰陣,專業嘅偲嫣BB即露出含羞答答模樣,Pete又笑喎…

Pete事後講番,話原來拍之前都唔知自己「中獎」,完全係俾人擺上枱嗰隻。問佢壁咚嗰下感覺係點?Pete諗咗一諗,話:「見到佢真人,都同我想像中差唔多,都係嗰啲人……即係一啲我哋年輕人未必接受到嗰種類型,都知瀨嘢㗎喇!當時又冇乜嘢好誇張好特別感覺,但挨埋去,仔細見到佢皮膚毛孔上嘅嘢,我忍唔住笑咗囉。所以我嗰吓笑,唔係一啲好浪漫好有戀愛感覺嘅笑容。」

「講真吓,玩玩吓好似我哋玩佢多過佢玩我哋,加埋Otto又叫我哋擺甫士,李偲嫣又覺得Otto train開人舞蹈,應該冇錯㗎啦,我唔知佢係咪好enjoy,但佢有少少含羞答答咁瞇埋眼再加嘴角翹起,我就覺得幾好笑嘅,希望大家睇完之後開心啦!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載