蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月05日

【金像獎前哨戰】胡子彤拎獎陪談善言剃頭 《點五步》導演捍衞言論自由

6,455
建立時間 (HKT): 0405 12:00

香港電影金像獎將於4月9日舉行,今年提名名單充滿新面孔,最開心梗係《點五步》班同學仔,因為該片有8個提名,導演陳志發Steve、演員談善言同胡子彤未知係咪太驚喜,得知入圍時唔係好識反應。

相關新聞:【遺憾失去童年】12歲跳舞賺錢養家 惠英紅:我人生好多殘缺位

Steve會爭新晉導演獎,佢回想剪呢套戲剪足一年,氣餒時曾經同剪接師大叫「金像獎!」然後會笑自己發夢,冇諗過今日會夢想成真。談善言係透過傳媒知道提名「最佳新演員」:「有記者打嚟話『你有金像獎提名喎!有咩感想呀?』跟住我話『吓?好開心囉!估唔到囉!我再打番去問Golden Scene同事,跟住佢咃話『真㗎』。」佢又指胡子彤應承過入圍會陪自己剪skinhead,同樣提名新演員嘅胡子彤就好認真咁話:「其實係我同阿談講,如果我嚟緊工作唔影響嘅,會願意陪佢剷。」

諗起入行至今聽過邊番說話最入心時,胡子彤開始眼濕濕:「班前輩都好鍾意我呢個角色,但唯一擔心就係驚冇人認得我。」其後子彤攞咗導演會最佳新演員獎,「陳志發同我講你今次攞到獎,呢個真係你嘅實力,你應該好好同自己講,俾啲信心自己,當下我真係......」身旁嘅兩人即刻拍拍膊頭講咗句:「儍仔嚟嘅!」佢哋嘅友情,無需多講,一個動作已經能夠表達。

相關新聞:【識英紅重英雄】點評準影后 惠英紅:5個都好勁

可能因為社會氣候又或者拍攝成本影響,新一代導演拍攝題材離不開本土情懷。問到佢哋覺得o依家拍戲模式同上一代有冇唔同,Steve表示:「對比以前年代嗰種紅褲仔出身,可能會好多粗口,好多壓力。」阿談就覺得上一代導演接受能力高啲,「你去做你想做嘅嘢,你唔一定要做到導演想要嘅效果,但你做到嗰種感覺嗰種氛圍都得。」佢又好感慨咁話:「呢行大家要去互相努力,互相共勉,一班年輕人唔會淨係孤軍作戰。」

相信鍾意《點五步》嘅觀眾都期待見到佢哋一齊踏上金像獎頒獎台。「贏就一齊贏,輸就一齊輸。」

採訪: 何永寧、黃芷蔚
攝錄: Neo、馮嘉銘
攝影: 沈健程
場地提供:山旯旮
胡子彤髮型:Keith_Wong@Orient4

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載