蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月06日

【高志森要告張國榮?】23年前舊事 哥哥爆seed:向華強搵我拍戲都要跟手續!

85,049
建立時間 (HKT): 0406 12:35

這陳年舊事,依家數番,都足足有23年之前。說也奇怪,這件事,2013年、14年同15年,都俾網民拎番出來loop一次。今年哥哥離世14周年,再被舊事重提。

相關新聞:【23年前舊事】不忿被屈收300萬 張國榮問高志森:點解要咁嗱渣啫?

事源1994年7月,高志森想請張國榮拍《香江花月夜》,但當時張國榮屬黃百鳴嘅東方電影旗下藝人,且已安排他接拍于仁泰嘅《新夜半歌聲》。高志森先下手為強,以飯局為名,寫下一張支票給張國榮,稱以示誠意。

張國榮同高志森講明,因為佢依家係黃百鳴嘅人,所以佢嘅檔期亦係由黃百鳴決定,對方已安排佢接拍《新夜半歌聲》,所以佢話唔到事。但礙於情面,高志森又盛意拳拳,故張國榮不好拒絕,暫且收下支票,諗住擇日歸還。豈料未幾高志森卻接受周刊訪問,指張國榮收錢不認帳,文章仲刊登一張冇mark死線嘅「300萬支票」。高志森於訪問中稱「我有權告張國榮!但我唔想玩嘢。」張國榮激動謂:「佢要告我,我歡迎!我拍十幾年戲,從來冇話俾人告,依家高志森嚟告我?講啲咁嘅嘢,簡直係垃圾。」及後張國榮應吳君如邀請擔任《娛樂性騷擾》節目嘉賓,本來冇諗住講,但君如問起,就令張國榮再忍唔住。

相關新聞:【賴炒作】高志森回應張國榮「嗱渣」論報道 借機宣傳音樂劇

以下係當日訪問原bite:

「你唔問我我係唔會講。」張國榮稱。

「係,我係有收過張支票,但我可以話俾你聽張支票都唔係300萬添。」吳君如聞言即謂:「影咗相出嚟喎,但係又冇日期又冇劃名。張國榮。」張國榮聞言即反問:「如果你整張cheque俾人,你會唔會唔寫?bullshxt!」君如又突破盲點謂:「同埋你真名都唔係叫張國榮。」

張國榮平心靜氣謂:「唔係……其實係事係有一個漏洞。因為行內大家都知道,張國榮拍戲咁耐,係唔用張國榮個名去收支票嘅!咁點解要咁樣寫張假支票出嚟呃人?」說時已開始有點激動。

「同埋,唔係話講得寸或者乜嘢,我係咪未見過一張一百萬嘅cheque先?點解要搞到單嘢咁大單先?就係話,你俾張支票我,你好想我拍呢部戲。你可以唔0架,只係話,你想show俾我睇你嘅誠意,然後我推咗好多次,我依家只係講個真相,我推咗好多次。」

「然後佢就話,唔緊要,我只係想話俾你知我嘅誠意啫!你可以唔拍,你真係可以唔拍,你可以問咗(黃)百鳴先,咩咩咩。成件事就係咁。」

「然後百鳴喺新加坡開完會返番嚟,然後就已經有人出咗報紙,話搵咗我拍戲。百鳴當然問我啦,我話冇喎, 係呀張支票我係收咗佢,咁點呢?你願唔願意我同佢拍戲?」

「因為我係百鳴嘅人,你打橫嚟講都唔得0架,係咪先?因為我唔係話乜嘢。向華強搵我拍戲,都要跟正手續。係咪先?人哋大嗱啩?向華強,但點解呢啲事唔會發生喺人哋身上?而要同一個,拍咗咁多部戲嘅老友要咁樣反面啫?我覺得冇咁嘅必要反面?我個朵都好響0架!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載