蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月06日
馬上成為壹會員

【23年前舊事】不忿被屈收300萬 張國榮問高志森:點解要咁嗱渣啫?

建立時間 (HKT): 0406 12:52

繼續是一段23年前的錄音,1994年張國榮接受吳君如、黃偉文嘅《娛樂性騷擾》訪問,回應高志森當時接受周刊訪問稱張國榮收了他的支票(訪問內容中,高志森未有親口提過支票銀碼,但報道中就刊登一張來歷不明、抬頭寫「張國榮」而銀碼是300萬的支票)之後卻拒絕拍攝電影《香江花月夜》,高志森更於訪問中稱「我有權告張國榮!但我唔想玩嘢。」令已歸還支票的張國榮激動不已,故當節目中君如一問起,張國榮即按捺不住。

相關新聞:【賴炒作】高志森回應張國榮「嗱渣」論報道 借機宣傳音樂劇

訪問第一part:
 【高志森要告張國榮?】23年前舊事無限loop 張國榮怒爆:bullshxt!
http://bit.ly/2nGhXUf

張國榮笑了笑,緩和番啲氣氛,「喺拍戲方面大家都係好happy 0架嘛,唔好搞到咁。」吳君如問:「呢個就係真相?」張國榮答:「係。」他承認之前回應此事時曾有點激動、衝口而出謂「正垃圾」,「我唔係話嗰個人係垃圾,我係講佢講嗰件事係垃圾。」又指報道中刊登的支票唔mark死線唔盛,更笑言「張國榮」同名同姓嘅人都幾十個,俾人執咗拎去入都唔奇:「你作為一間公司老闆,你會唔會做呢啲咁戇居嘅事先?我就唔會喇。」

相關新聞:馮仁昭四圍超:高志森憶張國榮往事

「我係好直嘅人。我都話囉,大不了你告囉,你講咁多Bullshxt做咩呢?你做乜講咁多嘢?佢作為一個已經有仔有女嘅人,我就冇啦,你作為一個有仔有女嘅人,唔該你就正正經經做番啲嘢啦。大佬,已經出嚟做嘢咁耐,已經做咗咁多部戲嘅導演,點解要咁嗱渣啫?」

張國榮謂,當日佢睇到周刊報道時,「真係覺得好『慶』!」「因為我拎番張支票俾佢嗰陣,已經係成個幾月之後嘅事,因為我當時拍緊兩部戲,我根本就冇時間見佢。咁然後我俾番張支票佢,咁你知咩事啦啦,根本我就唔可以拍呢部戲,咁你應該收番張cheque。收番張cheque之後仲有冇機會合作?當然仲有機會合作!咁咪要等兩年囉,因為我同黃百鳴張合約仲有兩年。如果你唔願意同黃百鳴合作嘅話,因為依家係你唔願意同黃百鳴合作吖嘛,唔關我事。」

張國榮在訪問尾聲,向君如及黃偉文一再重申:「你唔問我我係唔會講!但係我覺得好『慶』就係,之前我哋有個共識,就係話,嗰次我同佢最後一次見,我俾番張支票佢嗰陣,大家都有個共識,就係大家都唔會再(就呢件事)講任何嘢喇。咁大個人喇,唔需要講,你亦都知乜嘢事。你嚟『ai』我時亦都知係乜嘢一件事。依家你做咩啫?你係咪要搞宣傳啫?我覺得你做乜嘢要搵我過橋啫搞宣傳啫?係咪先?」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載