蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月13日

【用屎擦牙】《同囚》描繪少年囚犯被虐 游學修:拍得好唔舒服

12,604
游學修話拍完《同囚》留下咗陰影。
建立時間 (HKT): 0413 15:57

被列為3級、描寫青少年監獄嘅電影《同囚》,故事由真人真事改編,多位更生人士參演及擔任顧問,戲中講述監獄官同年輕囚犯其實係一齊坐監,懲教官對少年囚犯嘅虐待及折磨宣洩,關楚耀飾演狠辣懲教官,游學修飾年輕囚犯,被身心折磨,被逼用屎擦牙、每日全裸受檢喺獄中並非奇談。

飾演懲教官嘅關楚耀話:「當中好多演員入過去懲教署,佢哋都俾咗好多專業意見團隊,當中一啲真係坐過(監)嘅。」關楚耀同游學修有不少對手戲,關楚耀對游學修報以虐待、打鬧,關楚耀話:「唔係淨係打,我仲用個心鬧醒佢,戲裏面真心想教好學員,打得好狠,要講好多粗口,好爽。」

飾演年輕囚犯嘅游學修話:「獄中所有動作,包括坐同企都有要求,坐都係坐半邊凳,所有嘢都係一個懲罰。少年監倉係比軍訓更恐怖環境,我喺戲裏面係咁被人摑。有幾場戲講沖涼同身體檢查,要全身唔着衫被檢查,原先要黐膠紙,但係大家搞好耐都未黐到,又被副導演鬧,最終個個都冇黐膠紙同打底就咁拍,成排好壯觀。」年輕囚犯每日被心理折磨、精神虐待,游學修指:「入過去受嘅人話真實仲恐怖。」其中一場戲,游學修被教官逼令用手指洗擦馬桶並再用手指擦牙,游學修話:「拍完有心理陰影,拍時雖然唔係屎,但係廁所個馬桶係真嘛!拍得好唔舒服。」

監製梁鴻華指該片其實可以剪成2級,但覺得冇需要,佢同情於青少年監獄被虐待嘅囚犯,梁鴻華話:「犯事入去嘅,可能只係偷咗一支唇膏,《監獄風雲》講嘅係老鬼監獄,我哋講嘅唔係老鬼監獄,佢受到嘅懲罰係你冇辦法想像。」

場地提供:雲來軒

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載