蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月18日

【大團圓結局?】志明扮小雙俠向春嬌求婚 余文樂讚千嬅﹕靚屎人

19,339
建立時間 (HKT): 0418 20:36
楊千嬅同余文樂講番拍戲嘅嘢,就笑唔停口。(攝影:陳俊強)

由彭浩翔執導、楊千嬅及余文樂主演嘅《春嬌救志明》將於本月27日上映,三人早前喺旺角接受訪問時,提到樂仔喺戲中扮「小雙俠」向千嬅求婚,樂仔無奈咁笑住話:「係囉,多謝導演,次次都畀啲咁嘅嘢我嘆,你將痛苦建築喺人哋身上,不過其實千嬅都有扮。」千嬅即指:「我係靚嘅!」樂仔笑佢:「你幾時都靚架啦,有幾時唔靚丫,潑篤屎落嚟你都靚架啦,真係靚屎人。」千嬅沒好氣咁話:「拍嘅時候就係咁,冇當我係女仔,欺凌,有時一埋位嗌ACTION之前,佢哋就咬耳仔,拍拍下就拎條蕉出嚟!」彭浩翔笑指:「有時候,相處得耐咪需要啲工具囉,令到演出更加順滑!」

問到樂仔喺現實生活中,會唔會以「小雙俠」造型向女友求婚﹖佢表示唔知道,千嬅搭嘴話:「可能到最後係個女人向佢求婚,佢呢啲死人性格,佢係硬漢。」談及呢個故事係終結篇,抑或係可以繼續拍﹖彭浩翔話:「兩個角色到最後係冇死,我唔排除有繼續嘅可能性,但係我覺得第1集到第2集用咗兩年,第2集到第3集用咗4年,唔知下一次要用幾耐時間,目前未有計劃。」

相隔多年再合作,彭浩翔指大家都各有不同,佢話:「大家默契好好,觀眾見證住角色嘅成長,我同千嬅好開心見證樂仔嘅成熟,我同樂仔又好開心見證到千嬅步入更年期。」隨即笑聲四起,樂仔大笑:「嘩,你真係講架,我腳都軟。」彭浩翔一本正經咁話呢個係好好嘅經歷。千嬅不甘示弱反擊:「無論咩年紀,我堅持自己係一線,你一直係度衝突我...」彭浩翔話:「我冇呀,我絕對冇呀!」樂仔笑住話:「好喇,嚟!以和為貴!」

千嬅喺片場內外都經常被兩個大男人玩,佢話:「同佢哋拍戲拍得多會有精神病,成日都疑神疑鬼。」樂仔又笑千嬅:「你最多都係亂經。」千嬅笑指:「你又知我亂經﹖係咪亂咁驚慌﹖佢哋成日唔CUT機,一場戲拍成世,睇下你講咩,跟住又攞啲道具出嚟,有幾場戲有避孕套,人哋拍戲準備10幾個咪算囉,佢就攞成箱,夠100個家庭用。」彭浩翔即爆有人大包二包攞走,仲話千嬅係戲中件護士制服都畀千嬅攞走埋,樂仔笑話﹕「佢(千嬅老公丁子高)冇再跑啦,佢攰得滯。」千嬅冇氣咁話:「唉,我唔想再同你講嘢。」樂仔話:「有時我哋兩個知你想買啲嘢,但又唔好意思買,咁我哋咪求其搵場戲拍完話『啲制服畀千嬅啦』,我哋都係用心良苦。」

場地:帝京酒店
楊千嬅髮型:Vic Kwan@wecut.asia
化妝:Ling Chan @ ZING the makeup school
余文樂髮型:Ben Yeung (Hair Corner)
化妝:Jenny Tziong

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載