蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月01日

【《神鵰》郭襄苦戀林偉健12年】無綫小花黃曼凝 為加$200人工離巢

193,853
建立時間 (HKT): 0601 00:02

林偉健喺香港當紅期間,最為人記得嘅,除咗係佢嘅好身手,仲有就係感情生活,林偉健同TVB當家花旦黃曼凝,係公認嘅郎才女貌,天造地切嘅一對。而至於黃曼凝係邊個?篤下計數機,今年都55歲喇。

相關新聞:【82年出戰亞運】同體操王子李寧同場 林偉健:佢想用海鷗牌相機換我部Nikon

黃曼凝同林偉健78年拍拖,經歷7年之癢後,當時傳媒已經成日追問佢哋幾時結婚,當時只有23歲嘅黃曼凝就話唔想太早結婚要事業為重,亦不諱言話經過咗7年,彼此關係已由愛情變成感情。黃曼凝喺一次訪問時講到:「佢份人就係唔識浪漫,不過算啦,大家都相處咗咁多年,都習慣晒。要我開始另一段感情又嫌麻煩。兩個人一齊,除咗要適應對方,仲要適應對方家人。」去到89年兩人宣佈將於90年結婚,點知結婚變分手,結束12年嘅戀愛關係。

分手前,男方仲一時口快快,爆咗同黃曼凝曾短暫同居,兩人分手後有傳媒問番林偉健驚唔驚影響女方?佢話:「同前女友拍拖十年,如果話對方冇去過我屋企過夜,大家都覺得奇怪啦。」黃曼凝最終喺1993年退出娛樂圈,04年同浸大電影學院副教授盧偉力結婚。

相關新聞:【咸片都要演技】細數港產三級片男星 啫神.馬神.曹查理

黃曼凝喺81年參與拍攝香港小姐宣傳片俾監製睇中,直接簽無綫拍劇。因為古裝扮相靚,所以主力都係拍古裝,劉德華陳玉蓮版本嘅《神鵰俠侶》,就由黃曼凝飾演郭襄。除咗郭襄,84年周潤發版本嘅《笑傲江湖》,小尼姑儀琳就係由黃曼凝飾演。五呎六吋高嘅黃曼凝,喺無綫一直備受重用,1985年嘅《江湖浪子》係佢喺大台最後一個劇。當時無綫想搵佢續約,雙方就條件企硬,最後大台讓步,希望黃曼凝留低,但黃曼凝拒絕,佢話:「我思前想後,發覺自己實在損失太多,除咗自由,仲有原則。」故堅持離開。

離開無綫後曼凝為亞視效力,但佢喺亞視產量仲少過喺無綫,黃曼凝一次接受訪問,先至講番當年狠下決心離開嘅原因。佢話當時要求公司提出要求加一兩百蚊人工,但公司都唔肯。黃曼凝自言:「可想而知公司根本唔重視我,而且嗰陣都聽到風聲話公司準備搵我做咖喱啡。如果我唔早啲走,遲早都會俾公司搞到身價下跌。」

順帶一提,原來成龍都曾經做過黃曼凝「貴人」,嗰陣成龍紅遍日本,《A計劃》一上,黃曼凝咁就紅咗,成為日本影迷最鍾意嘅女星,但係日本fans只係知佢叫做「依利沙貝拉.黃」(黃於《A計劃》角色名)。得22歲嘅黃曼凝,嗰陣嗌成龍做「成龍叔叔」。84年9月,權威日本周刊《優先》宣佈日本十大外國男女演員名單,第一位係成龍,第五位係元彪、第六位係童星關繼威、即係《魔域奇兵》個小朋友。李小龍都係排第十。令人估唔到嘅係,十大外國女星榜,黃曼凝就係憑《A計劃》排第三,紅姑都係排第四咋。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載