蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月09日

【貼埋錢都係做閒角】「我都唔知點解我咁有錢」63歲鬼塚:打交都要我找數

95,982
最後更新: 0609 10:42 / 建立時間 (HKT): 0609 07:00

鬼塚喺日本好出名,日本漫畫《麻辣教師GTO》改編劇集,反町隆史、AKIRA(黑澤良平)都演過。

相關新聞:【店名叫「鬼塚」】「賣棺材㗎?」鬼塚成間舖齋賣黑衫 兩年先出一條褲

鬼塚,其實香港都有一個,80年代初,黑社會同鬼片橫行嘅年代,佢5呎4高,頭髮長長,專做監躉、黑社會嘅小角色,見到個樣,一定認得,佢係鬼塚。

【細佬係大狀伍健民】
本名伍健忠。今年63歲。鬼塚生得惡形惡相,其實心地善良,且口才了得。設計師出身嘅佢,最鍾意發明星夢,入行演得最多就係壞人同蠱惑仔。

相關新聞:【一係等死.一係減肥】瘦到「塌皮」 鬼塚一晚結束所有時裝店求保命

佢話:「我唔係蠱惑仔,我係一個非常好嘅爸爸、一個好丈夫。我係一個好老闆,我係一個好仔仔。屋企有三個仔,我排第六,九個都係仔,第十個就因為太窮,100蚊賣咗。

「爸爸身體唔好,冇咩娛樂,就成日同我阿媽搞嘢,搞咗十兄弟,又咁窮,屋企叫我6仔,我細佬好出名,做咗十幾年大律師,叫伍健民。」

【修哥開價:1日$600!】
鬼塚入行第一套戲係由胡楓(修哥)監製同導演,駱應鈞做男主角嘅《打藤》:「修哥見到我就話:『肥仔,你講嘢咁叻,可唔可以去我套戲做一個角色?一日,做監躉!』,就喺監獄做阿頭,1979年,拍一日600蚊,一定做喇!

「嗰時咩都唔鍾意,最鍾意係錢,哈哈哈!過咗一段時間,拍咗20日幾和味,個心好雄。本來係話拍一日,佢話我咁多嘢講、表情咁好,又加我戲,最初叫我做肥仔,後來話要我改個藝名,佢話我個樣似日本人,叫金田中喇!」

【「我都唔知點解我咁有錢」】
做咗一次大茄,鬼塚開始發明星夢,成日話要拍戲,結果9年後,先再有人搵佢拍第二套戲《江湖正將》,當時佢真超興奮,就算係借車貼錢拍戲,都在所不計。

「係同錢小豪、謝賢拍,嗰時我已經好有錢,我都唔知點解我咁有錢,總之我拎咩嘢嚟賣,就有人買!」

咁鬼塚點解叫鬼塚呢?佢就話:「我英文名叫Ken,一埋位叫Ken,原來個camera man又係叫Ken,一齊應,跟住有人叫鬼塚嗰個阿Ken,後來叫下叫下叫鬼塚,咁就叫鬼塚做藝名。我多謝晒導演陸劍明,所有陸劍明拍嘅戲我都喺度,佢話我係招財貓,套套都賺錢。」

鬼塚話拍咗咁多戲,其實冇咩人知佢係做fashion design:「我真正嘅錢係做時裝,完成心願就係要拍戲。嗰時我又肥又矮,滿面鬍鬚,核核突突,著鞋又唔著襪,邊個鍾意你呀!咁我唯一一樣嘢就係成日拎錢出來,嗰時我有個朵叫『埋單小王子』,總之我一返去就萬歲,打交都要我找數。」

【海報有名:我覺得我係明星】
當年飲茶灌水,日日萬歲,換來都係一個半個閒角,鬼塚話:「係二打六㗎咋!冇辦法,你個樣係咁樣,冇可能叫我扮皇帝㗎!你見到我長期做二打六,後來好少少,生番啲鬚,可以做大佬,一路都係做收數、打人,全部都係我做,非常好玩,我識咗好多好多人!

「戲行入面係好玩,喺呢個世界,仲有虛榮感,嗰啲海報有你個樣,有你個名鬼塚係度,睇午夜場,我覺得我係明星,我好開心。o依家我覺得我真係明星,因為我想做咩,我可以做,我唔需要再去求,你無慾無求,你就會品自高,你一同人傾計,你就會好有信心,話畀人哋聽,你係咩人,我唔會改變我自己,我每一日都會好開心。」

鬼塚仲話即使佢用錢把握每一個機會,今時今日佢仍然覺得係值得:「當然,你個袋係冇就唔好拎出來,但係你唔拎出嚟來冇話題,你去主動,任何嘢要去主動。

「你唔行,係冇人會跟住你走。做拍戲又好做設計又好,係必要做主動。如果我係個樣好似高大威猛蠱惑仔咁,一行出來係star啦!」

【「原來自己個樣衰到咁」】
後生嗰陣就話冇所謂,次次被派做蠱惑仔收數佬冇問題,但日日做大佬做足幾十年真係會悶。鬼塚話:「o依家個樣好啲,我自己睇到,有一日我行過啲櫥櫃,突然間回望見到一個人,心諗『咁X衰格嘅呢個人個樣』,行返轉頭想打佢,嘩!望真原來嗰個係自己,衰到咁衰。」

鬼塚一早已經生活無憂,63歲決定行入木人行學演技,問佢點解仲要踩入電視台捱更抵夜?佢話:「o依家被邀請返電視台,完成我嘅夢,每一日返工係拍戲,係好少錢,我話唔介意,佢哋即刻歡迎我!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載