蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月14日

【支持低成本製作】想再同發哥合作 杜琪峯:知佢今年好忙

5,808
建立時間 (HKT): 0614 13:10

顏卓靈同沈震軒等噚晚喺圓方出席電影《戀愛病發》鮮浪潮慈善首映,鮮浪潮創始人兼主席杜琪峯同鮮浪潮副主席舒琪當然亦到場支持。呢齣來自泰國嘅電影《戀愛病發》,由杜琪峯親自推薦,因為該片以低成本拍攝,仲喺泰國影展橫掃唔少獎項。

杜琪峯話:「希望新導演可以睇下,佢都係以低成本製作。我自己都好想拍低成本電影,不過有成20年冇用2、300萬去拍一齣電影,其實o依家都好多人支持年輕導演。」問到佢有冇見過候任特首林鄭月娥,叫對方支持下電影業?曾拍短片支持曾俊華選特首嘅杜琪峯,指政府其實都好支持電影業:「藝發局都好支持,不過我哋都要做好多創作先,唔係突然就叫人畀錢支持,都要拍啲野出黎畀人睇。」佢話最近忙緊多個劇本,仲話希望有機會同周潤發合作:「不過我知佢今年都好忙。」

有份出席首映嘅顏卓靈大讚泰國電影好吸引:「我都好恨拍愛情片,呢齣仲要有啲笑位,好貼近我哋嘅生活。」問佢想唔想同男友白只拍愛情片?顏卓靈笑謂:「啱就得㗎啦,最好就同靚仔拍,如果又靚又好戲就好。」記者即提議男友白只?佢反問記者:「佢靚仔咩?(你咁講男友會傷心?)佢有獨特形態,同佢拍都好,唔會介意。」佢又話平日同男友都會傾學術野,啲對話好有有深度:「我哋心靈交流,大家都鍾意有深度咁去研究。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載