蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月23日

【回歸廿年】台慶同頒獎禮拆伙有原因 陳志雲爆大台幕後故事

19,651
建立時間 (HKT): 0623 07:00

無綫2009年《勁歌金曲頒獎典禮》頒亞太區最受歡迎男歌星比林峯,原來陳志雲曾經反對?無綫台慶頒獎禮同台慶竟因為六嬸方逸華一句說話而要分拆?早年港姐選美,原來除咗評判比分之外,重有個「大內密探」暗中提供佳麗操行分畀評判?當年無綫連新聞報導內容編排都要同亞視鬥餐死?曾經効力無綫17年嘅前總經理陳志雲,就今次香港回歸20年電視行業轉變專題,大爆無綫一啲鮮為人知嘅小故事。

相關新聞:【回歸廿年】返大陸搵食靠「老本」 湯寶如搵人仔出碟回饋香港

每年11月19日係無綫台慶,每年無綫都會喺當晚舉行嘅《萬千星輝賀台慶》,動用全台藝員大肆慶祝,並喺1997年開始喺台慶舉行電視頒獎禮選視帝視后,而喺2006年開始,頒獎禮就分拆出嚟做一個獨立節目。

原來呢個頒獎禮,無綫製作部最初怕得罪人而唔肯做,陳志雲話:「呢個頒獎禮係我做節目部嘅時候提出,不過節目部冇製作節目,唯一製作節目係《K-100》,咁提出呢個構思,初初開會製作部就唔願意去做,話:『唔得架喎,會得罪人㗎喎。』呢個係你約(合約)嗰個唔係你約(合約),咁你比邊個?後來我話咁好啦,製作部唔做咁《K-100》做啦。《K-100》係一個宣傳本台節目嘅嘢,後來講咗一輪製作部先至願意去做。」

相關新聞:【回歸廿年】不敵科技進步? 由CD銷量鬥到變下載次數

講到點解後來頒獎禮同台慶分拆原因,志雲話:「我記得有次同方逸華小姐開會,方小姐話:『喂,你哋都好唔駛諗嘢喎,你喺《萬千星輝賀台慶》度做埋個頒獎禮,大部份時間都去咗頒獎啦,其他嘅嘢唔需要創作啦!』其中一個原因拆開係因為咁。當然另外亦有商業考慮因素啦,多咗一個大型節目賣比廣告客戶。」

以前台慶不時會有藝人表演高難度動作,但過去10年似乎冇呢啲場面見到。志雲就解釋:「拆開之後《萬千星輝賀台慶》做乜呢?又有啲嘢唔准喎,因為試過有時做啲危險動作真係出咗問題,出咗問題方小姐就比較緊張,佢話:『我哋係咪一定要做一啲咁危險嘅嘢,甚至可能對個藝員演出同事會擔心嘅嘢?如果係咁我哋唔應該做嗰啲啦。』咁又要諗過第啲方向。試過一個原則,保險公司肯受嘅就做啦。重有一個難處,因為TVB要製作嘅劇集真係好多,亦有好多藝員喺劇組,佢唔係淨係做《賀台慶》嗰晚放佢出嚟,個高難度動作重要排o架麻,如果製作嗰邊放唔到人,點排呢?呢個係實際嘅考慮,變咗就盡量唔做嗰啲啦。」

究竟《勁歌金曲頒獎典禮》、港姐或者台慶頒獎禮有冇造馬?志雲話:「香港小姐一定冇造馬,因為有其他評判喺度。o依家基制係點我唔知,但以往個評審團就係佢哋揀,不過,中間Rosa陳紫蓮(前港姐副統籌經理)做超級大保母嘅時候,因為佢同啲參選嘅港姐有一段好長嘅時間排練,佢有啲品行分會提供比啲評判,話比佢哋聽,基於事實基礎,會唔會有遲到佢會講,可能會考慮埋嗰啲,所以有時大家睇點解A君贏C君唔贏,我唔知影響到評判幾多,最終決定都係評判嘅。」

「你話《勁歌》係咪造馬,因為個基制係一個專業評審,可以話係電視台一個選擇,唔係百分百樂迷嘅選擇,如果你話咁樣係一個造馬嘅話,咁咪係囉!但呢個係一個專業選擇,喺嗰個角度、程度嚟講唔係一個造馬。你話大家傾嘅時候有冇拗到面紅耳熱?有嘅,你見到有啲自己心頭好,或者視帝視后頒獎禮都有嘅,大家可以紥到好『行』,好有趣架。」

記得2009年林峯第一次喺《勁歌》攞亞太區最受歡迎男歌星獎,好多網民鬧爆,重有網民取笑林峯亞皆老街至太子道西男歌手o添!原來當日內部開會話畀獎林峯嗰陣,志雲係提出反對。佢話:「嗰次我係唔同意。大家開會,我唔係話林峯唔好,當時我嘅意見提出係我唔認為佢喺嗰一年孭到嗰個獎,我覺得反而對佢唔好o添,但每個人判斷唔一樣,呢個係我當時意見,我未必啱,大家傾o架嘛。」

【回歸廿年】返大陸搵食靠「老本」 湯寶如搵人仔出碟回饋香港 【回歸廿年】不敵科技進步? 由CD銷量鬥到變下載次數 【回歸廿年】香港無迴響返大陸變天王巨星 雷頌德:點可以怪人北上? 【回歸廿年】最怕聽到「樂壇已死」 ToNick小龜爆Seed:係你冇留意 【回歸廿年】北上不是惟一出路 金牌經理人李進:歌手定位好緊要 【得多定失多】回歸二十年香港樂壇發生乜嘢大事件? 【回歸廿年】《一個字頭的誕生》隱喻港人徬徨 杜琪峯:人生遇到三叉口 【回歸廿年】重臨《香港製造》舊地 陳果嘆社會撕裂難拍《紅VAN》 【港人算甚麼?】搵香港做踏腳石!財團營運戲院有助爭大陸戲院經營權 【回歸廿年】探討《黑社會》世襲與競選 杜Sir望拍更多本土電影 【回歸廿年】免費電視台二變四 赤化染紅屢現 【回歸廿年】媒體主導變「觀眾話事」 電視收視流失串流平台變大趨勢 【回歸廿年】曾提出《我是歌手》同類節目 陳志雲:因為個運作模式唔同冇人有興趣 【97年港姐冠軍】佘詩曼摘季 翁嘉穗自爆獲無綫送來回機票 保證入廿名 【九七港姐索爆回歸】阿佘雙料視后 神隱李明慧秘嫁陳樹渠之子 【97年亞姐冠軍】巨躉變火柴人 韓君婷抑鬱暴瘦 纖體痾到冇得瞓 【選港姐遭嫌肥叮出局】韓君婷戲劇性亞軍變冠軍 當選翌日遭白鴿眼 【初戀男友病逝】戀陳欣健長女 41歲韓君婷:試過同性戀,但唔係我想要嘅嘢 【回歸廿年】陶傑憂西方文明沒落 未來十年做狗容易做人難 【回歸廿年】着老西做紳士評香港教育 崇英周國豐:寧送兩個仔去英國讀 【回歸廿年】K歌不再主宰音樂創作 陳少琪:得就多人睇,唔得幾出名都冇用
娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載