蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月25日

【鄭中基接班人?】希望喺演戲方面發展 King@C Allstar獲袁澧林讚沉實

6,390
攝影:仇志德
建立時間 (HKT): 0625 15:36

袁澧林(Angela)、樂隊C Allstar成員King、李任燊、彭永琛同導演陳雅莉,噚晚喺鑽石山出席電影《那一年.我17》謝票活動,佢哋都着住戲中學生校服造型現身。影合照時,Angela好豪爽咁搭住King膊頭不停傻笑,問佢做乜係咁傻笑?Angela笑話:「唔知點解見到King一身造型就好想笑。」

Angela話戲中King嘅角色好搞笑,但真人就好沉實,King即刻自誇係笑匠:「我本身好鍾意喜劇,偶像係Johnny Depp,我嘅喜劇領域好大。」Angela話:「嗰時拍戲,放飯時都見佢坐埋一邊睇星爺嘅作品,所以估佢都係好鍾意喜劇類。」

問King係咪諗住踏上喜劇之路?佢笑話:「拍完今次呢部戲之後,都唔知再有冇人搵我,我平時都係做音樂,今次有機會接觸音樂以外嘅嘢,可以用節外生枝嚟形容,不過都好開心大家反應好好,有嘅話都想再拍。」佢又話拍戲識咗好多新朋友,Angela就係其中一個,King仲大讚Angela係女神:「佢首作品做女主角,埋位已經好淡定。佢把聲都好靚,希望喺音樂方面都可以有合作。」

Angela被讚好開心,佢即刻讚番King:「佢唱歌、演戲都好好。」兩個互讚,好似有啲嘢咁喎,會唔會有發展機會?King即避開話題:「下一部戲都好呀。」Angela就笑話:「呢部戲你暗戀我,如果再有下部,不如我追你啦。」

King嘅一班兄弟就讚佢係鄭中基接班人,唔知King自己又點睇呢?佢話:「梗係冇可能,佢功力深厚,我初出茅廬,佢累積十幾年功力,不過我真係好鍾意拍戲,希望有機會喺呢方面發展。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載