蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年07月17日

【舅父係葉夏利】拍《回魂夜》最好玩 盧雄屋企人嫌地位低禁做戲

21,691
建立時間 (HKT): 0717 07:00

資深配音員盧雄接受港台節目《守下留情》主持劉偉恒同梁禮勤專訪,講到唔少佢拍電影嘅事,盧雄喺香港出生,佢話細個好怕醜,唔敢望人,讀一、二年班自己返學時被車撞到,膝頭跪地傷見骨,由於撞到個頭,所以記性好差,好番之後父母就送咗佢去嶺南寄宿,佢話:「好慘㗎,二年班晚晚喊,因為細個黐媽媽。」佢話當年讀三年班英文程度差,三年班只識「a man and a pen」,父親於是為佢轉學校,入華仁讀中學,其父做建築,家境本來不俗,但他讀初中時父親不幸病逝,家境開始變窮,一條褲由中一着到中五。

相關新聞:【朝早9點配到半夜3點】配主角音冇着數 盧雄:我配嗰啲奇難雜症

盧雄話自細鍾意做戲,但屋企有錢係大家族,唔准掂呢樣嘢,屋企人覺得做戲行地位仲低過乞丐,但佢幾個舅父就係做戲、做播音,其中一個舅父就係葉夏利,當年佢拍戲又喺港台做廣播劇,另一個舅父又係喺電台做廣播劇,而另一個舅父就喺日治時代做大戲,當年盧雄屋企大,有成千呎,成班舅父會上佢屋企操曲同排戲,自己亦因為咁愛上做戲同操曲。

講到有份做幕前嘅電影,盧雄覺得最好玩係《回魂夜》:「兩個幾月我都喺將軍澳一個屋苑拍,嗰陣未入伙,晚晚拍夜戲成班圍住,黃一飛、黃智賢、星爺呀,個個都係玩得,成班困住喺嗰度,有份拍就拍,冇份就傾偈呀玩呀,好開心,最開心呢套戲。」而《金玉滿堂》係佢另一部喜愛嘅電影。

相關新聞:【糖尿病瘦60磅】70歲盧雄多年拍戲又配音 大儍 何家駒就都係佢把聲

盧雄後來教人配音,係因為盧國雄喺明愛中心教緊配音,但盧國雄要移民,負責人就搵咗盧雄去教。講到想入行嘅人要有乜準備?盧雄話:「任何嘅人嘅聲都得,因為一套戲有咁多角色,唔係把把靚聲,如果由主角到茄喱啡都係靚聲,咪好flat?一定要有出入。」佢話未配過小生,咁多年都係配甘草,但都可以生存到,佢話要入行一定要有個心,因為人工平,一定要挫捱:「o依家好多後生仔,一學咗小小就覺得足夠自滿,呢個好弊,你入行首先要搵啱一個真係可以帶你入到行嘅師父,因為有啲教到你嘢,但未必帶到你入行,仲有啲係呃人,自己要小心啲啦。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載