蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年07月31日

【想熱死人咩】爛面梁家輝返指揮車涼冷氣 青雲爆汗三助手連環抹

21,384
建立時間 (HKT): 0731 17:11

麥浚龍(Juno)15年出咗首歌《羅生門》,為首舊歌《耿耿於懷》同《念念不忘》嘅故事埋尾,三部曲連住聽,係幾有feel嘅。

至於Juno執導嘅警匪片《風林火山》,之前話咗想拍成四部曲,《風》片今個月初已經開工,7月頭喺啟德郵輪碼頭拍咗幾日通宵。到上星期有facebook群組貼出一張鰂魚涌海景樓、海山樓嘅業主立案法團通告,寫住喺27至29號期間,有一間叫晉弘影業嘅公司會喺上址拍戲,睇返呢間電影公司,原來Juno個間。

其實海景、海山呢幾幢建築群都好出名,之前米高比爾(Michael Bay)導演嘅《變形金剛4》,就喺呢度嘅大天井同天台取過景,仲引發陀地勒索事件成為國際新聞。(新聞連結: http://bit.ly/2hfuujC )除咗拍戲好多人都鍾意嚟影相,日本男藝人野村周平就嚟過呢度幫雜誌影相。

講返套《風》片,根據通告安排咗喺25、26號搭景,之後幾日拍攝。《蘋果》上星期四去到,見到拍攝半日非常大陣仗,單係工作人員眼見都有成70人,服裝、化妝車都有幾部,而導演Juno安坐喺一部流動指揮車入面,四周仲用布幕遮實,保安非常嚴密。

到傍晚大概6點幾,見到戲中兩位主要演員梁家輝同劉青雲出現。工作人員先安排佢哋上車化妝同換戲服,見到當日大熱天時,佢哋唔止要着住長袖衫,仲要加埋厚褸扮冬天,家輝仲要化個爛面妝,真係熱上加熱,而青雲就有3位女助手幫手抹汗。每次拍攝完畢都見到佢哋會上番指揮車,一來可以同導演討論剛才嘅拍攝,更重要梗係過冷河嘆冷氣。而到第二日佢哋移師到茶餐廳同拍過《變形金剛4》嘅天台開工,不過仲未見同劇嘅另一位男主角金城武出現。

其實套戲除咗三位男主角之外,仲有好多大家熟悉嘅演員出現,好似係Juno同日本AV女優蒼井空合作演出嘅作品《復仇者之死》裏面,演警察嘅劉永今次會再演差人,延續《復》片入面嘅角色,同青雲合作演出一對警察拍擋。另外仲有久違香港銀幕嘅「整蠱之霸」程東、RubberBand阿正參加演出。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載