蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月02日

【我一個人煮(5)】為氹囡囡喊住整沙律 吳綺莉:做阿媽唔容易

32,317
建立時間 (HKT): 0802 07:02

一家人邊有隔夜仇?卓林曾經報警,指吳綺莉(Elaine)涉刑事恐嚇,近月母女關係緩和,卓林已搬回家與母同住。回家第一天,吳綺莉親手為囡囡煮咗一頓簡單晚飯,在微博留言﹕「不是要美酒好菜,要的是一家人平安快樂,愛心,感恩。」

吳綺莉喜歡下廚,全為照顧好小朋友健康,所以選擇嘅食物材料都係以健康為主。今集《蘋果》邀請Elaine喺新欄目《我一個人煮》一顯身手,示範用好辣嘅生洋蔥製作「用心良苦洋蔥沙律」,佢一邊切一邊眼泛淚光話﹕「為咗囡囡,幾辛苦都得!」Elaine坦言好味嘅食材通常唔健康,反而唔好味嘅就好有健康價值,佢話﹕「好似紫洋蔥、蒜頭都係好殺菌,但小朋友一定唔鍾意食,所以要成日諗新菜式。今次喺沙律中加入牛油果、蘋果、芒果同少少青檸汁,生果嘅甜味可以中和咗洋蔥嘅辣味,對抗流感好有效。我個女由細食到大,好少感冒,抗生素食得多都唔好。」

向來硬頸嘅Elaine坦言囡囡係佢嘅死穴,佢苦笑話﹕「真係一物治一物,但我諗所有媽媽都係讓步嗰個。」母女雖然偶有爭拗,但講到「洋蔥位」都係有好多,Elaine話﹕「有年我生日,心情唔好冇接佢放學,佢就用自己暑期工賺番嚟嘅錢買咗個蛋糕,然後行返屋企送俾我,呢刻回想番都好感動。」

而卓林快將18歲,有指佢同一位同性密友關係好好,Elaine坦言管唔到咁多﹕「我好開通,男女咩都唔緊要,當然唔好同動物啦,好爛嘅笑話,心地好最重要。」反而Elaine好想搵個伴,花咗兩個多小時煲咗一煲「合骨柔情豐胸湯」俾自己飲,佢笑話﹕「其實我好慳家,一個湯可以食三餐,快啲娶我返屋企啦,哈哈。其實我擇偶條件好簡單,想搵一個心地好同有上進心嘅男人。」


採訪:嵐山
場地:Kohler Kitchens
鳴謝:H&M Home

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載