蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月16日

【我一個人煮(9)】麥玲玲狠批鵝公喉易翻嫁 求桃花食冰有兵收

35,690
建立時間 (HKT): 0816 07:02

香港地女多男少,加上唔少港男搵老婆,都鍾意向大中華發展,港女想搵段好姻緣都咪話容易。

「想搵好姻緣,其實顏色同食物都真係可以催旺人緣。」家中有唔少粉紅戰衣嘅麥玲玲,除咗幫人睇掌睇相算命外,煮嘢食有一手嘅佢,今集《我一個人煮》就教大家泡製一個啱晒夏天又可以消暑、兼令你桃花旺盛嘅甜品─桃花人緣紅粉冰。

「冬天出世嘅人可以食多啲辣椒,夏天出世嘅人就多食海鮮,都可以旺人緣。而旺桃花其實鮮色好緊要,所以今次整呢個甜品,都係粉紅色同紅色為主。點解強調想要桃花就要鮮色少少,係因為你成日着深色衫,人哋真係睇你唔到o架,你睇吓以前皇帝選妃嬪,都揀個頭釵亮麗啲,啲衫鮮色啲。你環顧吓成個中環,啲女仔唔係灰色就黑色,所以香港啲女仔相對係少桃花啲。」

玲玲師傅仲話呢排係咪行正桃花運,其實都有樣睇,先睇對眼,後睇面色,眼要亮晶晶,面就要紅卜卜。不過香港現時女多過男,喺僧多粥少情況下,數字統計現今到咗適婚年齡嘅女仔,想搵Mr.Right,先要打低3、4個對手。不過玲玲師傅就叫香港女仔唔使太悲觀,總有出路嘅,「其實唔使太擔心嘅,只要你唔好淨係睇香港呢個市場。有啲女仔拍極拖都唔得,又或者係假桃花、邪桃花,其實唔一定要關注香港,亦可放眼世界,呢啲所謂條命屬夫妻宮相沖呢,如果揀外地人或去外國,反而會受歡迎。又或者可以考慮揀啲多男仔嘅行業,例如消防、建築等。」

你揀人人揀你,雖然喺香港搵個條件好嘅男仔唔係易事,不過唔少港女都仲抱有夢想,就係他朝有日可以嫁個有錢人。玲玲師傅話只要你留意吓豪門大戶娶新抱,你就會發現,今時今日選港姐,依然係一條入豪門捷徑。「或者有人會覺得市儈,不過有錢人都想搵個靚嘅女仔結婚,話晒一代醜媳婦,十代醜兒孫。咁靚唔靚其實好主觀嘛,港姐係大家公認嘅靚女,帶出嚟都威威啦,講到尾,其實富貴人家都會考慮『牌子』嘅問題。」

能否嫁得出,又可唔可以嫁個有錢人,玲玲師傅就話相學嚟講,女仔個鼻係緊要,鼻頭細就會嫁年紀大,鼻大容易姊弟戀,兩邊鼻翼太薄就有機會做人阿二,另外,原來女仔聲線都係重點,聲音沙啞亦有影響,如果女仔有副「鵝公喉」,就算幾靚都好,姻緣運埋到身邊都會輕易游走。

採訪:王梓嫚
攝影:仇志德
場地:Kohler Kitchens
鳴謝:H&M Home

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載