蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月21日

【《溏心》都要讓路】黎諾懿上位做廣告寵兒 新劇《燦爛的外母》拍完一個月即出街

79,848
建立時間 (HKT): 0821 00:01

由黃智雯、袁偉豪同陳智燊主演嘅劇集《三個女人一個因》,本來5月尾播,後來俾唔同嘅劇,好似《蘭花刼》、《賭城群英會》,仲有《同盟》「打尖」,以為可以接住《超時空男臣》出,點知突然又改播家燕媽媽(薛家燕)拍住黎諾懿主演嘅《燦爛的外母》,連陳智燊都話自己黑仔。

相關新聞:【愛‧回家帶挈】馬壯成功入屋 張振朗被捧上一線

據知,《燦爛的外母》拍咗兩個月,啱啱拍完就收到order話要播,由於只得3個星期時間做後期,所以其他做緊後期嘅劇,包括大台好重視嘅《溏心風暴》,通通都要讓路,集中人手喺呢個趕住出街嘅劇。

而《蘋果》就收到風,今次臨急臨忙要改播《燦爛的外母》,全因為《三》劇無廣告客睇得上眼,知情人話:「因為《超時空男臣》嘅反應唔錯,好多廣告客都諗住喺嗰個時段繼續落廣告,加上10月中秋節,有節日落廣告通常都會加碼,點知大家聽到緊接嘅劇係黃智雯搭近期人氣一般嘅袁偉豪同陳智燊,個個都想打退堂鼓,大台惟有急變陣,改sell一段時間無拍劇嘅家燕媽媽,同埋近期做咗廣告界寵兒嘅黎諾懿,啲廣告先至返晒嚟。」

相關新聞:【邊個先係廣告之王】「人父」形象吸客? 黎諾懿張繼聰廣告接唔停

知情人仲話,一個劇拍完一個月就要出街,喺大台係史無前例。黎諾懿接受傳媒訪問,講到佢係廣告界寵兒,佢即刻話:「嘩,我係韜家燕姐光啫!」講到個劇趕住出街,黎諾懿都認o依家做緊後期,但就話佢哋唔算太忙。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載