蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月13日

【「一直好驚被拆穿」】借港女拍AV之名上位 麥紫莉終道歉:唔係呢條橋我唔會出到位

789,250
建立時間 (HKT): 0913 00:02

20歲、擁有36G導彈胸嘅o靚模麥紫莉(Chili),今年7月聲稱會赴日本拍AV,成為全港首位AV女優。當時Chili嘅經理人公司話有意搵當地著名AV男優南佳也、清水健、中村DAIKI等一齊合作,仲唔排除玩街頭真人騷,相當之爆,全港各大小傳媒爭相訪問,令Chili一夜上位。(相關新聞﹕http://bit.ly/2vOkxMH )

不過亦有人會質疑真偽性,台灣著名AV達人「一劍浣春秋」列出三大疑點,仲話曾經向認識嘅日本經理人打聽過,大家都冇聽過有香港女優即將出道(相關新聞﹕http://bit.ly/2xptcJP)。但Chili每次出席活動都堅稱會拍,點知下月又下月,到近排先開始轉口風話:「唔係自己話要去拍,等公司安排。」(相關新聞﹕http://bit.ly/2fdEpTp)

套用陳志雲嘅金句:「真的假不了,假的真不了!」本報收到消息,Chili嘅經理人公司Hotline TV,其實係一間未有註冊嘅公司,聲稱會同日本製作公司合作都係「吹水」,目的只為捧Chili上位,賺多啲錢。而最近該公司出現財困,Chili屢次被拖糧,直至近日已經與該公司正式解約。

《蘋果》向Chili求證,佢終於說出真話,佢未有喊苦喊忽,反而好似鬆咗一口氣,佢話:「一直都好驚俾人拆穿,所以答問題都會口窒窒,所有關於性嘅問題,其實我一條都唔想答。」Chili直認宣稱拍AV係舊公司度嘅一條橋,當初聽嘅時候有擔心影響形象,但自己入行兩年幾都冇人認識,先配合搏一鋪。佢話:「公司覺得呢條係一條冇人行過嘅路,覺得會爆,可以接多啲job,我真係為搵錢。」

問到可擔心被指「大話精」?Chili話:「我預咗背負呢個名,之前出街都有人認得,雖然唔會走上嚟話點,但網上留言都好難聽,冇呢件事都咁,o依家話呢件事係假,預咗畀人鬧得更多。(有冇後悔?)一半一半,後悔用呢個形式搏出位,好似呃咗好多人,真係好對唔住!但另一方面,唔係呢條橋,我又唔會出到位。」

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載