蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月13日

【做戲嘅嘢識幾多!】黑超+GEL頭就可以變奸?等視帝陳展鵬話你知

28,317
一個字「型」!
建立時間 (HKT): 0913 00:10

大台劇集《同盟》喺今晚會播映大結局,不過正如網民咁講,劇情已經「堅離地」,好似喺噚晚嗰一集,話說陳展鵬同陳山聰為咗o氹Rainman入局,專登扮兄弟不如,喺天台打交,最後陳展鵬仲殺埋陳山聰,本來故事發展應該係進入緊張階段,點知原來笑位多過緊張位!

先係為咗令Rainman(江美儀)信以為真,陳展鵬喺集團俾陳山聰趕走之後,走咗去停車場,坐喺陳山聰架車頂等佢,本來係好嚴肅嘅一件事,但係視帝陳展鵬嗰個黑超look,MK得嚟,又真係冇大集團接班人嘅風範,差啲以為係喺球場爭波地踢波!之後有一場講陳展鵬去咗餐廳搵江美儀,江美儀話自己已經睇到佢哋兩兄弟打架,仲叫啲手下拎啲DNA去化驗,睇吓係咪陳山聰條屍,喺等報告嗰陣,唔知陳展鵬嗰種獨有嘅演技,哭笑難分兼咬晒唇嘅表情,破壞晒成個氣氛!

點知轉個頭陳展鵬扮洗衣工人去咗一間屋,話咗俾大家知,呢幕係局中局,鮑姐冇死,陳山聰亦都冇死,突然間又變番母慈子孝,兄弟互撐嘅場面,但係之後陳展鵬去咗江美儀間公司,表面上係扮投靠,實際上係諗住做黑客去入侵江美儀嘅電話,偷取佢啲資料,陳生揸住玩電話個樣,真係一流!

佢哋幾個將啲電話錄音交俾差人,搞到班江美儀俾拘留,呢個時候佢知道自己中咗計,發現山聰同鮑姐未死,一向冷靜嘅江美儀,突然好趕急咁走去教堂睇吓部電腦有冇被人發現,但原來陳展鵬一班人又跟住佢,最後梗係開晒鎗,突然間又殺咗個胡定欣出嚟,佢仲為咗陳展鵬擋咗一鎗,陳生又喊晒咁話最愛係胡定欣,又話唔知冇咗佢喺身邊會點過!

喺片尾預告,除咗歐瑞偉俾人脅持之外,仲見到林子善爭做主席,當然仲有定欣好離奇咁好番,又揸住支鎗殺人,但係亮點依然係喺陳展鵬身上,佢一人分飾兩角,一係唔GEL頭扮乖個樣,二係GEL晒頭扮奸個樣,好亂喎!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載