蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月14日

【借醉向阿佘示愛】無綫綠葉王戴耀明與圈外女友分手:童話係劇集先至有

270,316
最後更新: 0914 14:41 / 建立時間 (HKT): 0914 00:31

無綫綠葉王戴耀明,原來係有女朋友……曾經;而且,佢心目中仲有一個女神——佘詩曼。

03年,戴耀明同阿佘拍完《金枝慾孽》做咗好朋友,佢試過同阿佘講,話將來搵到錢要娶佢做老婆,又試過飲醉酒send短訊示愛話好掛住佢,不過戴耀明話預咗阿佘請食檸檬,希望將來可以有機會同佢拍戲有感情線,當係一個回憶。

至於目前嘅感情狀況,報道話戴耀明同拍拖5年嘅女友喺年初分手,雖然大家有啲懸殊,不過佢都好努力去賺錢,希望可以拉近距離,但係最後都冇結果。

戴耀明今日接受傳媒訪問時,哈哈大笑話:「我哋係好朋友,成日同埋阿戚(戚其義)成大班演員聚會,呢啲係講笑嘅說話,我哋嘅距離係10萬億咁遠,望吓就夠!」佢仲話:「不過阿佘真係好正,有時比男人仲男人,但係有時佢又好女人,性格又爽直,佢真係數一數二嘅珍品,難得一班朋友咁玩得,真係好難得!」

不過感情方面就似乎冇咁順利,好似佢同拍拖5年嘅圈外女友分手,戴耀明話:「其實分咗手都有一段時間,心情都已經平伏晒,童話故事只會喺劇集裡出現,兩個人相處,唔係淨係話好鍾意就得,有時位置太遠,一定會有好大壓力。」

「感情嘅嘢,都係等上天安排,係時候就自然會出現,冇得強求,順其自然喇!」

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載