蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月15日

【森美意外流出】小V領變大V領 黃心穎有解釋......

235,139
建立時間 (HKT): 0915 20:03

森美最近帶埋幾位靚女高海寧(高Ling)、黃心穎同麥美恩一齊飛去日本拍攝《森美旅行團》。森美今日喺instagram貼咗好多拍攝花絮,其中一張喺街頭影嘅大合照,竟然發現心穎件綠色冷衫拉到好低好低,好似就嚟跌落嚟咁,露出深長事業線。

奇怪嘅地方,係心穎件衫原本係小V領,突然變咗大V領,有人就陰謀論咁覺得,心穎係為隔籬多咗位勁敵──跌膊高Ling,所以要專登出奇招搶fo,唔少網民都留言話﹕「心穎BB件衫...一扯即跌!小心!唔該!」、「心穎受好大打擊呀?」森美見群情洶湧,已秒速delete咗。

仍身在日本嘅心穎,今日接受傳媒訪問時就覺得有啲冤枉,佢話﹕「其實好搞笑,我哋影完先見件衫跌到好低,喺group笑咗,仲叫大家唔好send出去。點知森美唔小心post咗出嚟,佢已經好內疚。」心穎話呢個係合家歡嘅旅遊節目,雖然件衫本身係跌膊,但自己都唔會專登拉低件衫。而森美把聲就好內疚,話好對唔住心穎,仲為對方平反,佢話﹕「我係有少少氣憤,因為佢係走光,但要俾人話搶fo,戥佢唔抵!其實佢由頭到尾件衫都好高,但我哋要抱起小朋友,動作大,又擺好多甫士,影咗好多相,真係得嗰張唔小心跣咗落嚟,佢都唔知。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載