蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月09日
馬上成為壹會員

【《短暫的婚姻》】陳奕迅首拍劇反應勁好 音樂成功帶動悲涼氣氛

最後更新: 1009 23:23 / 建立時間 (HKT): 1009 22:42

由陳奕迅、郭偉亮(Eric Kwok)、蔡思韵及蔡潔主演嘅ViuTv音樂新劇《短暫的婚姻》今晚首播,短短五集嘅音樂劇會配合Eason嘅國語專輯《C’mon in~》製作,每集三十分鐘。

延續ViuTv製作劇集嘅一貫風格,今晚首播嘅《短暫的婚姻》全部都係實景拍攝,劇中Eason飾演一名啱啱失去太太嘅單親爸爸,父子加埋女傭居住喺一棟舊式低層住宅,而Eric Kwok就帶埋蔡思韵飾演嘅老婆Melena同囝囝搬到呢棟住宅,兩家人因為咁而相遇,以今集首播嚟睇,劇情進展唔算快,而且因為係音樂劇嘅關係,對白唔算多,反而運用咗唔少鏡頭去渲染環境氣氛,令到觀眾更加融入故事當中,兩家人本來就係萍水相逢,所以雖然大家都知道蔡思韵飾演嘅Melena最終會同Eason發展婚外情,但係喺劇情上冇刻意刻劃呢條感情線。

首播只得短短三十分鐘,但係內容算得上非常豐富,劇集花咗前半段嘅時間帶動氣氛,去到最後Eason喺天台第一次講出對失去太太嘅感覺:「你覺得唔提我就唔會諗起喇咩?冇用㗎,我見到每樣嘢都會諗起佢,所以冇得避,亦都唔使避。」簡簡單單一場訴說戲,值得一提嘅係Eason喺呢場戲中嘅演技非常到位,演繹出一種悲涼、緬懷同時又要強顏歡笑嘅感覺,最後再配上一首《誰來剪月光》,以Eason嘅角度帶出呢段只有短短五集嘅《短暫的婚姻》,仲有唔少網民讚Eason做戲好睇。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載