› 選擇地區
三藩市
紐約
洛杉磯
其他美國地區
香港 台灣 北美
 
2017年11月01日

【意料之外】著作《伊巴謙的一天》奪兒童文學獎 彭浩翔:終於有嘢畀姪仔睇

建立時間 (HKT): 1101 18:32

由公共圖書館主辦嘅「香港中文文學雙年獎」今日公佈得獎名單,而導演彭浩翔同插畫家b.wing合作嘅繪本《伊巴謙的一天》,贏得兒童少年文學組的雙年獎。彭浩翔今日接受電話訪問,話自己真係冇諗過會攞文學獎:「好意外,一生幻想過攞唔同獎項,係冇諗過呢個獎。我認為有各種可能性,甚至影帝都有可能,就係完全冇諗過會攞中文文學雙年獎。」而彭浩翔就話今個月15日親自現身領獎。

講到故仔係早年去非洲肯雅探訪,見到位小朋友好得意,但生活好痛苦,佢話:「因為旱災,原本諗住拍戲,搵番嗰位非洲小朋友拍,08年寫埋劇本,喺釜山電影節攞咗劇本獎。當施南生已經搵到啲資金,想開工時,當地工作室叫我哋唔好去,因為政變話好危險。所以最後出咗書,其實主要係每一頁都有b.wing嘅插畫,我就寫少少文字。」

彭浩翔話一路都想拍戲或者最後變成動畫,佢咁大決心要做係多得美國位阿哥,佢話:「因為美國阿哥一直都唔畀佢啲小朋友睇我嘅戲,話唔啱小朋友睇。我話唔係吖,我啲戲成日有啲動物、有騾仔。所以係決心做一啲啱小朋友睇嘅嘢,本繪本15年出寄咗畀阿哥,畀咗細路仔睇。阿哥話『你終於有一樣可以畀啲細路仔睇』,呢本書係唯一過到佢審查,佢嚴過香港。」

「伊巴謙」就係彭浩翔所講嘅好得意非洲小朋友,繪本講到彭浩翔親身探訪長期受旱災的肯雅,體會生活中每一細節,體會伊巴謙嘅感受。兩位作者係書中都分別提到各自嘅體會,彭浩翔話:「我們怠惰,我們善忘,總有千百樣藉口,讓我們忘卻世上的不公義和苦難。單靠我們在飛機上的零錢布施並不足夠,我不認為問題能從那找到解決良方,但肯定的是,該把事情告訴其他人。」

而插畫家b.wing就話:「說是護水,我更想說的是愛惜我們現在身處的地方。一切由源頭做起,保護它的品質,保護它的需要。珍惜我們和它每一次的互動!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載