蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月02日

【我老公係發哥(4)】結婚係驚喜 發哥曾表明:你要記住,我唔會娶你㗎!

372,375
建立時間 (HKT): 1102 00:00

處境題:

首先,假設你有另一半,穩定交往中。
愛得天昏地暗,對方仲日日打俾你,日日寄postcard俾你,情深如《忘了,忘不了》裡的Ryan Gosling一日一封信求Rachel McAdams原諒。

但熱戀期還未過,對方卻跟你「約法三章」說:我唔會同你結婚。

同樣情節發生在發嫂身上。
曾經歷過一段失敗婚姻,所以當時發哥跟仍是陳小姐身份的發嫂說,「你要記住,我唔會娶你㗎!」

除非大家都有共識係唔結婚,否則,一聽到呢句,應該早就調頭走。
但發嫂不是這麼想。

最後發哥當然有娶發嫂,發嫂說:「佢娶得你,你係咪好lucky啊!」「你明唔明啊,唔好問咁多嘢啦!」

唔明。

「點講呀……因為佢一早同我講,即係拍拖嘅時候,佢話,你要記住,我唔會娶你㗎!佢表達咗㗎喇!你明唔明啊?咁嗰刻佢同你講(求婚)嘅時候,梗係好shock啦!」

「對我嚟講,我冇得諗喎!咁好隨意,哦,結婚就結婚啦!因為我嗰刻,坦白講,就係覺得,你愛一個人,係無條件㗎,唔需要去諗咁多嘢㗎!愛一個人係無條件㗎,做乜嘢要俾咁多嘢牽涉自己呢?」

「你當我傳統啲又好啦,依個係我想法囉。」

難道當刻發嫂連問「你之前又話唔娶我?」嘅衝動都冇?「唔會問。唔需要知咁多啦!佢娶得你,你係咪好lucky啊?你明唔明?唔好問咁多嘢啦!」完全不合常理。「係咪當初個啲postcard太sweet,所以氹到你?」發嫂笑言:「冇㗎!我覺得……係囉,黐線囉!」

至於求婚過程,原來更瘋狂。當時是1986年,發哥去紐約拍《秋天的童話》,仍是「女友陳小姐」身份的發嫂同行。

鏡頭前,船頭尺向十三妹講:「男人大丈夫,今日就今日,聽日就聽日!」現實中發哥拍完一個通宵,清晨7時,甫收工就向女友提議:「我哋不如結婚囉。」

陳小姐說好。

「係呀,(失驚)無神囉,朝早七點,拍通宵㗎嘛。(發哥話)我哋不如結婚囉,下?不如結婚?嗰刻我諗我傻傻哋啦。」發嫂憶述。

求婚儀式?「冇呀,我哋返去沖涼囉,就喺個church度,返去沖涼喎!因為捱夜咗,我都覺得好突然,返去沖涼!」發嫂不禁大笑:「係咁樣咋喎,冇求婚喎。」

「有咩失望啫?佢已經表達咗,佢唔會娶你,呢個係咪驚喜嚟㗎?返轉頭佢帶你去註冊,係咪呀?真係驚喜嚟喎!」沒想過要夢幻婚禮?「冇!冇諗過。總言之,你同佢就得,算啦!咁簡單,係咪好着數呀?」她笑問。

原來發哥的絕招,就係一句「你要記住,我係唔會娶你」富貴險中求,原來娶得美人歸,道理一樣。

其實發嫂跟發哥拍拖之前,唔係冇人追(詳見前文)。當時發哥的對手,係印尼人。兩者之間,發嫂揀咗發哥:「有得比較嘅時候,你就覺得嗰個冇咁有安全感。」難道同明星拍拖,有信心天長地久?「應該咁講,我嗰刻冇諗到發哥係巨星或者乜嘢,因為我真係唔係佢fans嚟㗎。佢pick up喺嗰度,識到佢,到到佢追我嗰刻,又講埋佢唔會娶我,好順其自然咁樣同佢拍拖喇。」

「周潤發當時都好似有好多風流新聞,你屋企唔會俾壓力你咩?」發嫂即答:「冇喎!我爸爸都開心嘅,佢哋冇俾呢啲壓力喎。」

新加坡出生、長大的發嫂,其實早於與發哥結婚之前,發嫂已經搬來香港、為父親打理生意,而並非外間以為發嫂係同發哥先同居後結婚;至於87年結婚這個美麗誤會,發嫂解釋,因為兩人在紐約倉猝註冊,未及通知家人:「爸爸係唔開心嘅,因為我係大女,到1987年,發哥好好,就同我爸爸講,好啊!擺酒啊!就個個以為我1987年結婚囉,實在係1986。」

還記得,張婉婷曾解說過,《秋天的童話》最後一場戲交代船頭尺十三妹在碼頭重遇,「Table for two?」然後,就沒有然後了。因為兩人性格大相逕庭,浪漫只是一刻,最終還是會分開。

幸好發哥發嫂有個美麗的Happy Ending。

採訪:陳月媚、倩宜
攝錄:卓振輝、廖達燊、吉吉
攝影:郭賢興、陳順禎
協力:林德雄
髮型:Byron Ho、Louis of Hair Culture
化妝:Fiona To
場地提供:香港嘉里酒店

更多娛聞,喺晒《娛果》
http://fb.com/appledailyent


「我老公係發哥」:《蘋果》娛樂即時 X「娛果——蘋果娛樂」,10月30日起,逢周一至五刊登。

【我老公係發哥(1)】懷孕十個月女兒胎死腹中 發嫂堅持順產:我點都要經過呢個過程
http://bit.ly/2xybbWp

【我老公係發哥(2)】「我個女死咗喇!」發嫂冇坐月:發哥即刻帶我離港
http://bit.ly/2ie4zpq

【我老公係發哥(3)】發嫂爆發哥追女手法 日日寄PostCard晚晚追魂Call
http://bit.ly/2xEQAzu

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載