蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月08日

【點止得結衣BB】《乒乓情人夢》集齊唔同年代女神演出

15,824
《乒乓情人夢》集齊多位唔同年代女神合作。
建立時間 (HKT): 1108 18:15

由新垣結衣夥拍瑛太嘅日本片《乒乓情人夢》在當地開畫即登上票房冠軍,又一次證明結衣BB目前嘅號召力。《乒乓情人夢》除咗結衣BB飾演「天才乒乓少女」主角多滿子外,同佢合演嘅多位女星都來頭不少,仲係來自唔同年代嘅女神代表,包括飾演其乒乓球會戰友嘅廣末涼子、演阿媽嘅真木洋子、藝能界新一代小花永野芽郁、曾經係氣質女星icon嘅蒼井優,連就快58歲嘅田中美佐子都唔係茄喱啡,佢曾經都係電視圈昔日花旦嚟!

相關新聞:【慌張西望】為勇敢的失敗者喝采!

廣末涼子90年代紅透半邊天,近年佢甘願做配角,明顯唔想背負擔正女主角嘅壓力。廣末展開第二段婚姻後共有三個細路,目前夥拍綾瀨遙新劇《太太、請小心輕放》演一個寂寞人妻,今次《乒乓情人夢》則演一個曾經係不良少女嘅醫生太太吉岡彌生,對乒乓球會不離不棄,雖然只係配角,但角色討好之餘,37歲嘅佢仍不失光彩。

蒼井優曾幾何時係影壇數一數二嘅氣質女星,在岩井俊二電影《青春電幻物語》、《花與愛麗絲》中都令影迷驚為天人。蒼井優近年開始挑戰唔同戲路,今次在新片中扮成來自中國嘅四川飯店嘅隱世乒乓高手「楊」,蒼井優演出夠晒驚喜,更演活強國人特色,更幫主角多滿子及萩原展開地獄式訓練。

相關新聞:【影視囍雙飛】《逃恥》重播賀結衣BB封視后 《乒乓情人夢》直迫10億票房

18歲嘅永野芽郁被受事務所力捧,入行8年演過不少人氣劇,仲開始擔正做日劇及電影主角,今年喺真人版《帝一之國》中就飾女主角白鳥美美子,成為當地新世代小花。喺《乒乓情人夢》中,永野芽郁扮演結衣BB情敵小笠原愛莉,同瀬戸康史演嘅江島晃彥屬乒乓球界金童玉女,角色天真背後其實是個小惡魔。

58歲田中美佐子喺片中同遠藤憲一合演夫妻,二人專心打理蕃茄種植園,閒時打吓乒乓波消遣,最後竟然組隊出戰全國賽事望圓兒子遺願。查實田中美佐子曾經都係藝能界花旦,為唔少愛情劇擔任女主角,全盛時亦以一頭黑色長髮迷盡男觀眾,搶手到為佢帶來年薪多達700萬港元,更在事業高峯時下嫁諧星深澤邦之,為家庭明顯減產。

真木洋子憑F Cup上圍及風騷形象迷倒不少男觀眾,多年來活躍影視圈,34歲嘅佢仲以人母姿態發展,不過前年同男星片山怜雄離婚後無論事業及外型都急轉直下,早前擔正的富士電視台劇集《瑟西爾的企圖》更收視仆直,令女優事業響起警號。今次真木洋子扮演結衣BB嘅嚴厲母親,雖然戲份不多,但忘我演出已令觀眾刮目相看。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載