蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月14日

【奶粉錢被走數】點解追糧都好似係做錯?孫慧雪:以後都會學聰明啲

173,147
建立時間 (HKT): 1114 14:44

喺今年7月生咗「小饅頭」Riley嘅孫慧雪,o依家佢專心湊仔之餘,亦會做KOL兼拍吓廣告,不過今日阿雪喺fb貼咗張張whatsapp cap圖,原來佢喺陀B嗰陣接咗個廣告,但係到O依家都未收到錢!

阿雪話:「想問:咁樣係唔係已經走咗我數?其實每次工作我都好盡力同好爽快地完成,然而每次追數都好似我要求人咁,有試過因為爭成年,我先開口問,都被人話我Chur住追數⋯⋯但我真係做咗!自問都好有禮貌呀?點解要求出糧好似我做錯咁?呢單仲要大住肚來做,我覺得咁樣都走數,真係好無良,我好嬲呀!」

留言一出,唔少網民都鬧嗰間公司無良,有人提議阿雪入稟小額錢債追錢,亦有人叫佢不如公開嗰間公司個名,阿雪亦都有回覆,佢話:「其實該公司嘅前員工都同我講,話我O依家whatsapp緊嘅其實唔係佢,所以我都唔知邊個?而好多人已經中咗招,亦有好多人搵咗小額錢債向呢間公司索償,但佢哋真係同嗰啲人慢慢玩,日日上庭,就算判咗上告人勝訴,都有半年俾佢慢慢還!而佢地公司亦已經無再運作,有人話佢哋已用其他公司名,所以大家小心啲,都係簽晒文件先!或者要求deposit!!謝謝!」

今日阿雪接受傳媒訪問,佢話:「其實我自己都覺得有啲無奈,自己做咗嘢,應該係要攞番自己嘅人工,但係嗰邊已經唔見咗人,所以我先至出post,我已經預咗收唔返,但係我都想大家小心啲。將來我同人接job,都會返簽番啲文件保障自己!」

唔知呢間公司係咪第一次合作?阿雪話:「我哋之前都合作過幾次,不過每一個job都有好多原因話要遲啲先可以俾到錢,但係最後都有俾返我,點知到最尾呢個job,直頭係唔見咗人!」阿雪仲話:「今次當係買一個教訓,嗰筆錢唔算係一個大數目,只係當時接job係大住個肚去接,但係你都唔出數俾我,真係好衰,好多謝大家戥我唔抵,我以後都會學聰明啲!」

更多娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載