蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月14日

【講明唔去】傳大台縮皮台慶踢走羅嘉良 宣萱:我當年離開都係誠意問題

79,978
建立時間 (HKT): 1114 19:04

今日有報社於跑馬地馬場舉行報慶活動,鄭明明、任達華、宣萱、李蕙敏、泳兒、洪卓立、湯怡、羅霖、苟芸慧及男友陸漢洋、關心妍及老公、韓君婷、連詩雅、鄭融、許霆鏗等齊齊現身。

其中華哥任達華接受訪問時,表示:「今日嚟支持下,最近傾緊有電影要開,雖然聖誕有嘢做,不過依家plan緊一家人去旅行,係要安排下,好想同屋企人過白色聖誕。」華哥仲話想去芬蘭:「其實上年一家人都去咗加拿大滑雪,不過今年想去有聖誕氣氛嘅地方。」華哥又話囡囡由細到大都好鍾意鹿,希望今次去芬蘭可以帶囡囡睇真鹿。

同場嘅宣萱就話最近忙於喺大陸工作,佢話:「嚟緊要飛成都,之後又要去橫店為大陸劇客串,要成半個月。」問到佢嚟緊嘅大台頒獎禮有冇收到邀請,宣萱直言話冇。問到有指羅嘉良因為幾萬元被大台取消邀請,宣萱就話:「我有睇,不過人哋嘅嘢我唔comment,但係我之前都講過我當年離開都係誠意問題,但係杜生(杜之克)好好,之前幾次合作都係佢專登搵我傾合作,所以我只會同杜生傾。」佢仲話有誠意就會繼續合作。講到如果出席頒獎禮好大機會成為視后,宣萱就話唔應該出席先有獎攞,不過佢工作都好忙,未有時間出席。

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載