蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月16日

【碌盡人情卡】入行25周年演唱會 湯寶如:遺憾請唔到張學友

15,635
建立時間 (HKT): 1116 11:25

湯寶如(湯記)慶祝入行25週年嘅演唱會噚晚喺九展順利完成,除自己作品外,全晚湯記亦唱咗唔少其他歌手,包括四大天王嘅作品,又對歡眾講四大天王中自己最鍾意張學友:「因為同我合唱《相思風雨中》,又同一間公司。」

嘉賓方面,湯記請咗喺《流行經典50年》合作嘅曹永廉、黎小田同薛家燕,又有黎瑞恩、黃翊、陳曉東及譚詠麟現身。湯記同東東先合唱《打開天空》,然後再問東東幾時開騷?東東話:「其實未簽約唔講得住,但喺公開場合唔講唔得,我明年2月9日喺澳門威尼斯人會舉行第一場世界巡迴演唱會。」獲台下熱烈歡呼。Encore環節由壓軸嘉賓譚詠麟現身同湯記合唱《暴風女神》同《愛情陷阱》,氣氛熱烈。阿倫話雖然多年嚟從未同湯記合作,但今次開騷一定要嚟支持,仲話:「湯寶如調轉就係「如寶湯」,唱歌好似飲補湯咁。」

演唱會尾聲湯記同觀眾表示:「真係唔捨得,希望你哋會一直掛住我,我就算唔開騷都會出歌,會繼續追求音樂夢想,唱多啲好歌畀大家聽。」然後再演唱最後一曲《感冒》嚟結束演出。完騷後湯記表示要多謝所有演出嘉賓:「人情卡上面我盡晒力,不過遺憾嘅就係請唔到張學友,因為佢要走tour,但係有機會嘅,希望不久將來可以同譚詠麟同學友合作。」

湯記又透露囝囝因為發燒,所以未有留到最後:「佢呢幾日病咗,但都有到一到,之後就返咗去休息瞓覺,呢幾日都冇返學。」咁會唔會入紙紅館?佢話想儲多啲歌先,自己亦計劃明年初派新歌,希望19、20年左右先諗紅館。又透露《流行經典50年》將喺12月再拍新一輯,所以會一路忙到出年。


更多娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載